Rúmlega 50 styrkir úr Rannsóknasjóði

Vísindamenn við Háskóla Íslands hlutu tvo öndvegisstyrki, eina stærstu styrki sem veittir eru árlega hér á landi til rannsókna, við úthlutun úr Rannsóknasjóði Íslands í ár. Greint var frá úthlutun styrkja til nýrra rannsóknaverkefna á Rannsóknaþingi Rannís í gær. Alls hljóta vísindamenn og doktorsnemar við HÍ og tengdar stofnanir rúmlega 50 styrki úr Rannsóknasjóði í ár og þeir renna til fólks á öllum fimm fræðasviðum skólans. 

Rannsóknasjóður Íslands er einn helsti samkeppnissjóður á sviði vísinda og rannsókna hér á landi. Sjóðurinn styrkir verkefni á öllum sviðum vísinda og allt frá doktorsstyrkjum til öndvegisstyrkja. Hinir síðarnefndu eru veittir til viðamikilla verkefna sem skara fram úr á sínu sviði og hafa alþjóðlega skírskotun. 

Alls bárust Rannsóknasjóði 414 gildar umsóknir að þessu sinni og voru 70 þeirra styrktar eða 17% umsókna. Styrkveitingar til nýrra verkefna nema á þessu sinni rúmum 1,3 milljarði króna, en fram kemur á vef Rannís að þar sem verkefnin eru almennt til þriggja ára verður heildarkostnaður vegna þeirra tæplega 3,8 milljarðar króna á árunum 2026-2028.

Að þessu sinni veitti sjóðurinn tvo öndvegisstyrki. Þeir komu í hlut Hans Tómasar Björnssonar, prófessors við Læknadeild, fyrir verkefnið „Kortlagning á sértækum kæliferli í spendýrafrumum“ og Finns Dellsén, prófessors við Deild heimspeki, sagnfræði og fornleifafræði, til verkefnisins „Samstaða í vísindum“.

Þá var einnig veittur einn nýliðunarstyrkur sem ætlað er að styðja unga vísindamenn í uppbyggingu á rannsóknahópum og -aðstöðu. Guðjón Ólafsson, lektor við Læknadeild, hlýtur styrkinn til verkefnisins „Hlutverk þráðhaftsumritunar og frumustreitu í litningaóstöðugleika“.

Alls bárust 163 umsóknir um verkefnisstyrki til rannsókna á vegum vísindamanna háskóla og rannsóknastofnana á Íslandi og voru 29 styrktar að þessu sinni. Tuttugu styrkjanna renna til vísindafólks við HÍ og samstarfsstofnanir. Þau starfa á sviði efnafræði, umhverfis- og byggingarverkfræði, rafmagns- og tölvuverkfræði, líffræði, umhverfis- og auðlindafræði, lýðheilsuvísinda, læknisfræði, íþrótta- og heilsufræði, sálfræði, hagfræði, talmeinafræði, félagsfræði, íslensku, fornleifafræði, sagnfræði og málvísinda.

Af 15 nýdoktorastyrkjum sem veittir voru að þessu sinni komu 14 í hlut starfsfólks við HÍ og tengdar stofnanir, en það starfar m.a. innan jarðfræði, eðlisfræði, sjávarlíffræði, sálfræði, umhverfis- og auðlindafræði, mannfræði, málvísinda og bókmenntafræði.

Tuttugu og þrír doktorsnemar fengu styrk úr Rannsóknasjóði og eru 17 þeirra við HÍ eða tengdar stofnanir. Þeir fást m.a. við þróun lífeldsneytis úr úrgangsolíu og metanóli, líkanagerð fyrir gosstróka og -mekki, stofnerfðafræði hafarnarins, spálíkan fyrir slitgigt í hné, fæðufærni og fæðuóöryggi, ástarkraft og gagnkynja ástir meðal ungs fólks, áskoranir friðlýstra svæða í Norður-Pakistan, brottflutning fólks úr Grindavík og hugmyndina um réttlæti á netsvæðum hægri öfgamanna.

Nánari upplýsingar um styrkt rannsóknarverkefni má finna á vef Rannís.,