Þyrlan mikilvæg í heilbrigðiskerfinu

Auður Elva Vignisdóttir, doktorsnemi við Læknadeild

„Þyrla Landhelgisgæslunnar hefur náð ellefu manna áhöfn farskipsins Fernanda sem eldur kom upp í um átján sjómílum utan Vestmannaeyja. Voru mennirnir allir komnir upp á þilfar skipsins og biðu þar björgunar en eldur logaði í vélarrúmi og brú þess.“ Svona hljóðar frétt á heimasíðu Slysavarnafélagsins Landsbjargar og er hún mjög í takt við fjölmargar aðrar þar sem fjallað er um björgunarflug þyrlusveita Landhelgisgæslunnar. Vitað er að þyrlur Landhelgisgæslunnar eru lífsnauðsynlegar þessari þjóð. Nú er í gangi doktorsverkefni við Háskólann þar sem farið er ofan í saumana á öllum þyrluflugum Landhelgisgæslunnar til að meta hlut þeirra í björgun mannslífa.

„Við förum í gegnum öll útköll þyrlunnar og skoðum hvers konar sjúklinga hún hefur flutt. Þetta er allt frá hjartveikum eða slösuðum sjómönnum í verulega slasaða einstaklinga í umferðarslysum. Við viljum sjá hvaða áhrif þyrlan hefur meðal annars á lífslíkur þeirra.“

Þetta segir Auður Elva Vignisdóttir, doktorsnemi í læknavísindum, sem leiðir rannsóknina. Henni er málið býsna skylt því hún er læknir á bráðamóttöku Landspítalans og sömuleiðis á þyrlu Landhelgisgæslunnar. Þegar við náum tali af Auði Elvu er hún nánast nýlent úr björgunarferð þyrlunnar austur á Hérað þar sem rjúpnaskyttu var bjargað en hennar hafði verið leitað í tæpa tvo sólarhringa. Enn og aftur sannaði þyrlan þar mikilvægi sitt.