Artëm Ingmar Benediktsson, doktorsnemi við Uppeldis- og menntunarfræðideild
Straumar frá fjarlægum slóðum leika um háskólasvæðið enda stunda á annað þúsund nemenda af erlendum uppruna nám og rannsóknir við Háskólann. Sumir þeirra dvelja hér í skamman tíma sem skiptinemar, aðrir koma til að sækja sér grunn- eða framhaldsmenntun en fara svo af landi brott og enn aðrir hafa kosið að hefja nýtt líf á lítilli eyju þar sem allra veðra er von. Sumir flytjast hingað með maka og börn, aðrir kynnast ástinni og eignast fjölskyldu.
Í doktorsverkefni sínu glímir Artëm Ingmar Benediktsson við þá spurningu hvernig innflytjendum gengur í háskólanámi, hvaða væntingar þeir hafa og hvaða hindrunum þeir mæta. Hann skoðar tækifærin sem háskólanám skapar innflytjendum og hvernig samskiptum þeirra við samnemendur og kennara er háttað. Í rannsóknarhópi, sem Artëm tilheyrir, eru sjö aðrir rannsakendur, þau Hanna Ragnarsdóttir, prófessor, verkefnisstjóri og leiðbeinandi Artëms, Börkur Hansen prófessor, Jón Torfi Jónasson prófessor, doktorsnemarnir Anna Katarzyna Wozniczka og Susan Rafik Hama, Anh-Dao Tran nýdoktor og Kriselle Lou Suson Cagatin meistaranemi. Hópurinn hlaut rannsóknarstyrk frá Rannís til verkefnisins.
Artëm Ingmar Benediktsson
„Þessi rannsókn er mikilvæg því staða innflytjenda í háskólanámi hefur lítið verið rannsökuð hér á landi en töluvert er til af rannsóknum um stöðu innflytjenda í menntaskólum og í grunnskólum.“
„Þessi rannsókn er mikilvæg því staða innflytjenda í háskólanámi hefur lítið verið rannsökuð hér á landi en töluvert er til af rannsóknum um stöðu innflytjenda í menntaskólum og í grunnskólum,“ segir Artëm Ingmar. Lítið hafi verið fjallað um innflytjendur í stefnu þriggja helstu háskólanna og því bæti rannsóknin við þekkingu á þessu sviði. „Rannsóknin er samfélagslega mikilvæg vegna þess að fjöldi innflytjenda í háskólanámi eykst á hverju ári og skólarnir verða að vera meðvitaðir um áskoranir sem innflytjendur upplifa og þá þekkingu og reynslu sem þeir hafa í farteskinu,“ segir doktorsneminn.
Artëm Ingmar er sjálfur innflytjandi og hefur farið í gegnum háskólakerfið; stundaði BA-nám í dönsku og MA-nám í Norðurlandafræðum. Hann þekkir því kosti og galla kerfisins og hefur margt fram að færa af persónulegri reynslu. „Flestir viðmælendur í rannsókninni eru jákvæðir gagnvart háskólakerfinu. Helst koma upp vandamál vegna tungumála, skorts á upplýsingum um nám og samfélag eða praktísk vandamál vegna dvalarleyfa,“ segir Artëm Ingmar.
Rannsókn Artëms, sem er nýhafin, byggist á viðtölum við nemendur af erlendum uppruna en niðurstöður liggja ekki fyrir. Artëm Ingmar segir að nú þegar hafi ýmislegt áhugavert komið fram, m.a. að innflytjendur eigi stundum erfitt með að kynnast fólki innan skólanna og taka virkan þátt í háskólasamfélaginu. Tungumálið sé oftar en ekki lykill að lausn við þessum vandamálum og innflytjendur, hugmyndir þeirra og víðsýni auðgi sannarlega samfélagið á Íslandi.
Leiðbeinandi: Hanna Ragnarsdóttir, prófessor við Uppeldis- og menntunarfræðideild.