Ágúst Ólafur Ágústsson, aðjunkt við Viðskiptafræðideild
Sjónvarps- og kvikmyndaiðnaðurinn á Íslandi stendur frammi fyrir ýmsum áskorunum og má nefna ólöglegt streymi, tækniframfarir og efnisveitur sem starfa á gráu svæði. Engu að síður er iðnaðurinn nú svipaður að stærð og mjólkur- og kjötiðnaður á Íslandi og gerir ekkert nema stækka. En hvernig má útskýra stöðuga grósku á meðan ólöglegar athafnir dafna í skjóli tækniframfara? Svörin má finna í rannsókn sem Ágúst Ólafur Ágústsson, aðjunkt við Viðskiptafræðideild, vann en Félag rétthafa í sjónvarps- og kvikmyndaiðnaði fól honum að kanna umsvif sjónvarps- og kvikmyndaiðnaðar á Íslandi.
Nú er velta sjónvarps- og kvikmyndaiðnaðar á Íslandi 34,5 milljarðar og svokallaður virðisauki greinarinnar um 11 milljarðar. Ágúst segir ástæður gróskunnar í þessum iðnaði vera að hluta til vegna aðgerða stjórnvalda. „Við sáum það eftir hrun að annars vegar var aukið fjármagn sett í Kvikmyndasjóð og hins vegar fóru framleiðslufyrirtæki að nýta úrræði í lögum um endurgreiðslu framleiðslukostnaðar,“ segir Ágúst en rannsóknir hans sýna að hver króna sem fer inn í iðnaðinn skilar sér tvöfalt til baka. Þrátt fyrir það, segir Ágúst, eru stjórnvöld treg til að leggja fjármagn í hinn skapandi iðnað.
Ágúst Ólafur Ágústsson
„Við sáum það eftir hrun að annars vegar var aukið fjármagn sett í Kvikmyndasjóð og hins vegar fóru framleiðslufyrirtæki að nýta úrræði í lögum um endurgreiðslu framleiðslukostnaðar.“
Niðurstöður rannsóknarinnar sýndu enn fremur að um 1300 ársverk eru í sjónvarps- og kvikmyndaiðnaði á Íslandi sem er á við a.m.k. þrjú stóriðjuverkefni. „Stjórnvöld hafa verið að berjast fyrir að fá þessi stóriðjuverkefni með skattaívilnunum og fjárfestingarsamningum og að setja þennan geira í samhengi við það er mikilvægt,“ segir Ágúst.
Hann telur hagfræðina sýna að styðja eigi við nýsköpun, uppfinningar og menningu. „Þetta hefur svokölluð jákvæð ytri áhrif sem einkamarkaðurinn er ekki fær um að skapa í þeim mæli sem skynsamlegt er. Þetta er bara góður bissness,“ segir Ágúst. Almenningur virðist enn fremur sammála mörgu sem kemur fram í skýrslunni því samkvæmt könnun Gallups frá svipuðum tíma telja 78% landsmanna mikilvægt að stjórnvöld veiti sjónvarps- og kvikmyndaiðnaði aukinn stuðning.
Meðal úrbóta sem Ágúst leggur til er að efla íslenska framleiðslu með auknum framlögum í Kvikmyndasjóð og framlengja lög um endurgreiðslu framleiðslukostnaðar. Einnig segir Ágúst mikilvægt að upplýsa neytendur um hvernig megi nálgast efni á löglegan hátt og gera það aðgengilegra því rannsóknin sýnir að neytendur kjósa það fremur.
