Þorgerður Sigurðardóttir, doktorsnemi við Læknadeild
„Í minni doktorsrannsókn einblíni ég á grindarbotninn hjá konum fyrir og eftir fæðingu,“ segir Þorgerður Sigurðardóttir, sjúkraþjálfari og doktorsnemi í líf- og læknavísindum. Hún er einn af helstu sérfræðingum landsins í sjúkraþjálfun sem tengist heilsu kvenna og rekur Táp sjúkraþjálfun í Kópavogi.
„Ég ætla að kanna hvort líkamlegt álag hjá konum fyrir fæðingu hafi hugsanleg áhrif á fæðingarferlið,“ segir Þorgerður um rannsóknina og bætir við: „Síðan ætla ég að rannsaka hvort það dragi úr þvagleka og blöðrusigi ef konur fá aðstoð sjúkraþjálfara fljótt eftir fæðingu.“
Þorgerður útskýrir að áhugann á viðfangsefninu megi rekja til starfa hennar sem sjúkraþjálfara en hún hefur fengist við vandamál sem tengjast heilsu kvenna sérstaklega í 25 ár. Þvagleki er algengt vandamál og koma konur til hennar í sjúkraþjálfun úr öllum áttum.
Þorgerður Sigurðardóttir
„Ég fæ íþróttakonur til mín með þvagleka við álag, konur eftir fæðingu með þvagleka og eldri konur sem eru með versnandi einkenni. Verkjavandamál hjá báðum kynjum sem jafnvel trufla kynlíf eru algengari en margir vita.“
„Ég fæ íþróttakonur til mín með þvagleka við álag, konur eftir fæðingu með þvagleka og eldri konur sem eru með versnandi einkenni. Verkjavandamál hjá báðum kynjum sem jafnvel trufla kynlíf eru algengari en margir vita,“ segir hún.
Þorgerður segir það ljóst að líkaminn er ein heild; það er fátt sem starfar eitt og óháð öðru. „Ef kona styrkir grindarbotninn geta bakverkir minnkað. Almennt jafnvægi í bol batnar.“
Fyrstu niðurstöður rannsóknarinnar á því hvort æfingaálag fyrir fæðingu hafi áhrif á fæðingarferlið sjálft hafa þegar litið dagsins ljós. „Miðað við úrtak í þessari rannsókn er enginn munur á fæðingarútkomu milli kvenna sem ekki æfa og hinna sem æfa mikið. Þegar margar breytur eru skoðaðar saman, svo sem hæð móður, líkamsþyngdarstuðull, lengd æfingatíma, þyngd og höfuðstærð barns, reynist sterkasta sambandið milli stærðar barns og verri fæðingarútkomu,“ segir hún.
Þorgerður bætir við að mikilvægt sé að fræða konur og gera þeim grein fyrir því að vanrækja ekki eigin heilsu. „Konur sem glíma við grindarbotnsvandamál hætta kannski að hreyfa sig þegar þær fá þvagleka, þyngjast og fá hækkaðan blóðþrýsting og svo koll af kolli. Þetta er þúfa sem veltir bjargi.“ Ábyrgð einstaklingsins sé mikil en ábyrgð heilbrigðisstétta sé að fræða.
„Það er mjög mikið hægt að gera við þessum vandamálum og því fyrr sem hjálpar er leitað, því betra. Það eru allt of margar konur sem leita sér ekki hjálpar en umræðan er góð. Hægt er að fá hjálp og stuðning hjá sjúkraþjálfurum, læknum og ljósmæðrum,“ bendir hún á.
Leiðbeinendur: Kari Bø, rektor og prófessor við NIH í Ósló, og Þóra Steingrímsdóttir, prófessor við Læknadeild