Þorvaldur Gylfason, prófessor við Hagfræðideild
„Náttúruauðlindagnægð virðist víða hamla vexti og viðgangi efnahagslífsins sé ekki vel á málum haldið eins og dæmin sanna, m.a. vegna þess að gnægðin dregur úr fjölbreytni og fjölhæfni. Miklu skiptir að kortleggja samhengið milli auðlindagnægðar, fjölbreytni og loftslagsbreytinga,“ segir Þorvaldur Gylfason, prófessor í hagfræði. Hann vinnur að rannsókn sem miðar að því að kortleggja kostina sem fylgja fjölbreyttu efnahagslífi og skoða fjölbreytni sem aflvaka hagvaxtar í heimsbúskapnum.
Í rannsókninni beinir hann sjónum sérstaklega að efnahagslífi sex landa á ólíkum stöðum í heiminum: Íslandi, Grenada, Kúveit, Malasíu, Máritíus og Úganda. Löndin eiga það sameiginlegt að efnahagur þeirra hvílir eða hvíldi mjög á náttúruauðlindum. „Kveikjan að rannsókninni var Parísarráðstefnan um hlýnun loftslags af mannavöldum í desember 2015. Rannsóknir á hlýnandi loftslagi virðast benda til að löndum með fjölbreytt efnahagslíf veitist auðveldara en öðrum löndum að grípa til viðeigandi ráðstafana gegn frekari hlýnun loftslags,“ segir Þorvaldur enn fremur.
Þorvaldur Gylfason
„Rannsóknir á hlýnandi loftslagi virðast benda til að löndum með fjölbreytt efnahagslíf veitist auðveldara en öðrum löndum að grípa til viðeigandi ráðstafana gegn frekari hlýnun loftslags.“
Þeim sem fylgst hafa með fréttum dylst ekki að loftslagsbreytingar eru stærsta viðfangsefni samtímans, bæði gagnvart almenningi og vísindamönnum. „Nauðsynlegar gagnráðstafanir gegn frekari hlýnun eru náskyldar viðeigandi ráðstöfunum til að stjórna nýtingu náttúruauðlinda. Skyldleikinn blasir við. Fiskurinn í sjónum er sameign samkvæmt lögum og bráðum vonandi einnig samkvæmt nýrri stjórnarskrá alveg eins og loftið sem við öndum að okkur hlýtur að teljast vera sameign,“ bendir Þorvaldur á, en hann sat í stjórnlagaráði sem vann nýja stjórnarskrá fyrir Ísland í kjölfar efnahagshrunsins.
Þorvaldur hefur þegar kynnt rannsóknina víða um heim og texti um hana bíður birtingar á vettvangi Sameinuðu þjóðanna að hans sögn. „Tvær styttri afleiddar ritgerðir eru enn fremur í vinnslu,“ segir Þorvaldur að endingu.