Þröstur Þorsteinsson, prófessor við Jarðvísindadeild
„Við rannsökum hvaða áhrif gróðurbelti við umferðargötur hafa á styrk svifryksmengunar af völdum umferðar, það er að segja hvort og þá hversu mikið gróðurbelti draga úr svifryksmengun,“ segir Þröstur Þorsteinsson, prófessor í umhverfis- og auðlindafræði, sem tekst á við vágestinn sem margir höfuðborgarbúar kannast við og veldur því að fólk þarf jafnvel að halda sig innandyra við tiltekin veðurskilyrði.
Í rannsókn sinni kannar Þröstur einnig hvernig gróður hefur áhrif á svifryksmengun en það getur verið á mismunandi vegu. „Einn möguleiki er að gróður virki eins og sía á agnir. Annar er sá að gróður dragi úr flutningi efnisins, virki nánast eins og veggur, en þá hlýtur mengunin að aukast hlutfallslega götumegin við gróðurbeltið miðað við sambærilegan stað þar sem gróðurbelti er ekki til staðar,“ útskýrir Þröstur.
Þröstur Þorsteinsson
„Við rannsökum hvaða áhrif gróðurbelti við umferðargötur hafa á styrk svifryksmengunar af völdum umferðar, það er að segja hvort og þá hversu mikið gróðurbelti draga úr svifryksmengun.“
Hann bendir á að æ betur komi í ljós hversu skaðleg áhrif svifryk hefur á heilsu manna. „Sennilega kemur ekki til með að draga verulega úr umferð á næstunni en ýmsar rannsóknir benda til þess að gróður geti dregið úr loftmengun. Rannsóknir á beinum áhrifum gróðurs eru þó enn nokkuð misvísandi og því er full ástæða til að framkvæma slíkar mælingar hérlendis enda getur svifryksmengun af völdum umferðar orðið mikil hér,“ segir Þröstur sem hefur kannað loftgæði út frá ýmsum sjónarhornum, m.a. með gervitunglagögnum. „Ég hef einnig unnið náið með læknum og vísindamönnum í tengslum við lýðheilsurannsóknir,“ segir Þröstur.
Niðurstöður rannsóknanna liggja ekki fyrir og þar er votviðrinu á höfuðborgarsvæðinu í sumar m.a. um að kenna. „Veðrið í sumar gerði það að verkum að ekki tókst að framkvæma mælingar, það var hreinlega ekki þurrt tvo daga í röð. Hins vegar verður unnið að verkefninu í vetur með rannsóknum á barrtrjám og lauflausum trjám og svo næsta vor og fram á sumar,“ útskýrir Þröstur. Hann er ekki í vafa um þýðingu rannsóknar- innar. „Niðurstöður verkefnisins munu nýtast við skipulag umferðarmannvirkja og við rannsóknir á lýðheilsuáhrifum af völdum svifryksmengunar. Einnig kemur þetta verkefni til með að veita upplýsingar um dreifingu svifryksagna eftir stærð og leiða til betri upplýsinga fyrir almenning um möguleg heilsufarsáhrif af þessari mengun,“ segir Þröstur að lokum.