Karen Ralston, MA-nemi við Íslensku- og menningardeild
„Þetta snýst um börn með einhverfu og málþroskaröskun sem fá ekki kennslu við hæfi,“ segir Karen Kristín Ralston, meistaranemi í málvísindum, um kennsluefni sem hún hefur þróað fyrir börn með einhverfu sem eiga erfitt með að tileinka sér beygingarreglur í íslensku. Þar kemur stærðfræði m.a. við sögu.
Hugmyndin að verkefninu mótaðist bæði af reynslu Karenar sjálfrar í námi og sona hennar. Karen ólst upp í Bandaríkjunum og eftir að hún fluttist til landsins nam hún íslensku sem annað mál með sálfræði sem aukagrein við Háskóla Íslands. Hún bendir á að 76% íslenskra orða beygist eftir fimm mismunandi reglum og þessar beygingarreglur lærði hún eins og stærðfræðireglur til þess að öðlast betri tök á tungumálinu. „Ég á tvo syni með einhverfu og málþroskaröskun en þeir geta lært ýmsar stærðfræðireglur. Ég tel að börn með einhverfu geti nýtt sér beygingarreglur eins og stærðfræðireglur. Með því að temja sér að nota þessar reglur eru tölfræðilega miklar líkur á að hitta á rétta beygingarmynd orða,“ segir Karen sem er einnig með BA-próf í þroskaþjálfafræði.
Karen Ralston
Karen bendir á að 76% íslenskra orða beygist eftir fimm mismunandi reglum og þessar beygingarreglur lærði hún eins og stærðfræðireglur til þess að öðlast betri tök á tungumálinu.
Í námi sínu í sálfræði kynntist hún atferlismótun og nýtir hana við þróun kennsluefnisins en afurðin er kennslubók sem tilbúin er til yfirlestrar og prófunar. „Ég hef unnið að verkefninu með styrk frá Rannís og í samstarfi við Hjallastefnu BSK Reykjavík, einhverfudeild Fellaskóla og þjálfunarsetur fyrir börn með einhverfu í Vífilsstaðaskóla. Ég met málvitund barnanna og hvort þjálfunin henti þeim en þessi kennsla nýtist aðeins þeim sem eru með málþroskaröskun,“ segir Karen sem kennir börnunum málfræðireglur og leggur fyrir þau verkefni. Sumarið 2014 hyggst hún svo mæla framfarir barnanna við að leysa verkefnin.
Karen vonast enn fremur til þess að hægt verði að þróa tölvuforrit þar sem börnin geta þreytt verkefnin. ,,Það er dýrt að hafa manneskju sem hefur bæði þekkingu á málfræði og atferlisþjálfun í kennslustund með einhverfum börnum. Oftast eru ekki næg fjárframlög til þess að hafa slíka kennara. Með forritinu mætti á einfaldan og ódýran hátt kenna einhverfum börnum með málþroskaröskun að nýta sér þessar reglur til að beygja orð rétt,“ segir Karen að lokum. Þess má geta að verkefnið var valið eitt af fimm öndvegisverkefnum námsmanna sem tilnefnd voru til Nýsköpunarverðlauna forseta Íslands.
Leiðbeinendur: María Garðarsdóttir og Sigríður Þorvaldsdóttir, aðjunktar við Íslensku- og menningardeild.