Doktorsvörn í ferðamálafræði - Þórný Barðadóttir

Streymi

Doktorsefni: Þórný Barðadóttir

Heiti ritgerðar: Hreyfanleiki Melrakkasléttu: Etnógrafísk rannsókn á staðarmyndun, ferðamálum og öðrum hreyfanleika á jaðarsvæðum (Mobilities in Melrakkaslétta. Ethnographic inquiry into placemaking, tourism and other mobilities on the margin )

Andmælendur:
Dr. Jørgen Ole Bærenholdt, prófessor við Deild fólks og tækni, Háskólanum í Hróarskeldu, Danmörku
Dr. Anniken Førde, prófessor við félagsvísindadeild, UiT - Norðurslóðaháskólanum í Tromsø, Noregi

Leiðbeinendur:
Dr. Gunnar Þór Jóhannesson, prófessor við Líf- og umhverfisvísindadeild Háskóla Íslands
Dr. Katrín Anna Lund, prófessor við Líf- og umhverfisvísindadeild Háskóla Íslands

Einnig í doktorsnefnd:
Dr. Jo Vergunst, dósent við Mannfræðideild, Aberdeen Háskóla, Skotlandi

Doktorsvörn stýrir: Dr. Snæbjörn Pálsson, prófessor og deildarforseti Líf-og umhverfisvísindadeildar HÍ 

Ágrip

Þessi ritgerð fjallar um doktorsrannsókn á tengslum staðarmyndunar, hreyfanleika og jaðarmyndunar í samhengi ferðamála.

Í rannsókninni er horft til þess hvernig staðir verða til og umbreytast í tengslum við og í gegnum hreyfanleika, bæði innan staða sem og í tengingum þeirra við aðra staði og önnur svæði. Í ritgerðinni er því jafnframt velt upp hvernig hreyfanleiki getur á sama tíma myndað tengingar sem og stuðlað að jaðarmyndun, hvort sem það gerist vegna fjarlægða, vegna skorts á tengingum eða hvoru tveggja.

Rannsóknin byggir á kenningum um flata verufræði og efnislega tengslahyggju, sem gengur út frá því að veruleiki okkar sé byggður á tengslum. Hefðbundinni tvíhyggju er hafnað og í staðinn horft til þess hvernig veröldin er samansett af samofnum, síbreytilegum, efnislegum þáttum þar sem hið mennska er hluti þess meira-en-mennska.

Rannsóknin er eigindleg og aðferðafræð hennar byggir á etnógrafískri nálgun þar sem helstu aðferðir eru vettvangsathugun, viðtöl og samræður á rannsóknarsvæðinu. Það er Melrakkaslétta á norðausturhluta Íslands. Melrakkaslétta er tangi sem teygir sig lengra til norðurs en nokkurt annað svæði á meginlandi Íslands. Tanginn stendur jafnframt langt norðan helstu ferðaleiða innanlands og eins langt frá helstu gátt til landsins og landið leyfir.

Til rannsóknar er hvar og hver staðurinn Melrakkaslétta er, hvernig hann hefur þróast og umbreyst í tengslum við meira en-mennskan hreyfanleika. Skoðað er hvernig þessi sami hreyfanleiki hefur áhrif á og myndar miðju og jaðar og áhrif þessa á möguleika fámenns svæðis utan alfaraleiða til uppbyggingar ferðaþjónustu.

Nýnæmi rannsóknar felst í að beita fræðilegri nálgun ferðamálafræða við framkvæmd rannsóknar á fámennu svæði utan alfaraleiða og niðurstöður hennar sýna fram á þátt hreyfanleika sköpun miðju og jaðars, sem ekki á síst við í samhengi ferðamála.

Um doktorsefnið

Þórný Barðadóttir er Þingeyingur að uppruna en hún er fædd árið 1970 og ólst upp á Kópaskeri við Öxarfjörð. Undanfarna áratugi hefur hún verið búsett í Eyjafirði og þar fæddust börn hennar tvö sem bæði eru uppkomin.

Fyrsta útskriftargráða Þórnýjar úr framhaldsnámi var sveinspróf í kjötiðn sem hún lauk árið 1994 og árið 1997 lauk hún prófi í matvælaiðnfræði frá Tækniskólanum í Holsterbro.

Eftir heimkomu frá Danmörku stýrði Þórný uppsetningu eftirlits- og gæðakerfa í matvælavinnslum víða um land áður en hún sneri aftur norður og sneri sér að mjólkur- og kjörframleiðslu á eyfirsku býli.

Árið 2010 settist Þórný á skólabekk á ný, nú við Háskólann á Akureyri þaðan sem hún lauk BA námi í fjölmiðlafræði vorið 2013 og MA námi í rannsóknatengdum félagsvísindum vorið 2016.

Hún hefur síðan starfað sem sérfræðingur við Rannsóknamiðstöð ferðamála, undanfarin ár meðfram doktorsnámi í ferðamálafræðum við Háskóla Íslands. Frá árinu 2024 hefur Þórný jafnframt sinnt hlutastöðu sérfræðings við Stofnun Vilhjálms Stefánssonar.