Doktorsvörn í Jarðfræði - Ahmed Hamdi Abdrabou Moghazi

Streymi á Zoom:
https://eu01web.zoom.us/j/69416792652

Heiti ritgerðar:
Umhverfi og loftslag Nihewan-dalsins í norðausturhluta Kína á fyrri hluta pleistósen

Andmælendur:
Dr. Jonathan Holmes, prófessor í eðlisfræðilegri landafræði, University College London, Bretlandi
Dr. Christopher J. Bae, prófessor í mannfræði, University of Hawaiʻi at Mānoa, Bandaríkjunum

Leiðbeinandi:
Dr. Steffen Mischke, prófessor við Jarðvísindadeild Háskóla Íslands

Einnig í doktorsnefnd:
Dr. Ívar Örn Benediktsson, rannsóknarprófessor við Jarðvísindastofnun Háskóla Íslands
Dr. Þorsteinn Þorsteinsson, Veðurstofu Íslands

Doktorsvörn stýrir:
Dr. Andri Stefánsson, prófessor og deildarforseti Jarðvísindadeildar HÍ

Ágrip:
Nihewan-sigdældin í norðurhluta Kína varðveitir fjölda fornminja frá fyrri hluta pleistósen á fornsteinöld og er einn elsti fundarstaður frummanna utan Afríku. Í þessari doktorsrannsókn er gerð greining á setlögum úr þremur skurðum á Dachangliang hryggnum í norðausturhluta Nihewan-sigdældarinnar. Markmið rannsóknarinnar er að endurskapa umhverfis- og loftslagsbreytingar og meta tengsl þeirra við athafnir frummanna á fyrri hluta pleistósentímabilsins. Fjölþáttanálgun er beitt, þar sem vettvangsathuganir eru tengdar við greiningar á kornastærð, segulviðnámi og samsetningu tvískelja skelkrabba (ostracod). Að auki er notast við breytubundin kornastærðardreifingarlíkön (end-member modeling), greiningar á hringferlum jarðlagaskipanar (cyclostratigraphy) og greiningu á stöðugum samsætum í skeljum skelkrabba (δ¹⁸O og δ¹³C gildi). Setlögin sem rannsökuð voru eru að mestu túlkuð sem árset sem var upphaflega vindborið. Það safnaðist upp í sex setmyndunarhrinum, annars vegar í votlendi með tímabundnum stöðuvatnamyndunum, og hins vegar á ársléttum. Kornastærðardreifingu samsetta sniðsins NH-T má rekja til fjögurra ólíkra þátta (EM1-4). EM1-3 voru notaðir til að draga ályktanir um sögu monsúnrigninga um sumur og vetur (EASM/EAWM) í austurhluta Asíu. Skilyrði til sumarrigninga voru ríkjandi fyrir um 1,66-1,62, 1,52-1,25 og frá 0,82 milljónum ára. Aftur á móti voru skilyrði til vetrarrigninga ríkjandi frá u.þ.b. 1,62-1,52 milljónum ára og á tímabili mikilla umbreytinga á mið-pleistósen fyrir um 1,25-0,82 milljónum ára. Óvenju sterk samfylgni δ¹⁸O–δ¹³C bendir til þess að vatnasvæðið hafi að mestu verið aflokað og orðið fyrir áhrifum uppgufunar. Greina mátti breytingar á vatnafari milli stöðuvatnsástands og rennandi vatns. Samhliða fornleifagögnum virðist sem frummenn hafi verið á vatnasvæðinu á tímabilum þar sem loftslag með sumarrigningum (EASM) og myndun stöðuvatna var ríkjandi. Samanlagt skerpa þessar niðurstöður skilning okkar á þeim hagstæðu og óhagstæðu loftslagsskilyrðum sem mótuðu athafnir frummanna á fyrri hluta pleistósentímabilsins á þessu svæði. Þannig leggja þessar rannsóknir mikilvægan grunn að frekari rannsóknum á fornloftslagi og umhverfisaðstæðum frummanna í Austur-Asíu á fyrri hluta pleistósen.

Um doktorsefnið:
Ahmed fæddist árið 1992 í Aswan í Egyptalandi. Hann lauk bachelor-prófi í jarðfræði árið 2013 frá Aswan-háskóla í Egyptalandi og meistaraprófi í olíujarðverkfræði árið 2019 frá Háskólanum í Miskolc í Ungverjalandi. Á árunum 2014–2017 og aftur 2019–2021 starfaði hann sem kennslu- og rannsóknaraðstoðarmaður við jarðfræðideild Aswan-háskóla. Sumrin 2018 og 2019 tók hann þátt í rannsóknarstarfsnámi við GFZ Helmholtz-miðstöð jarðvísinda í Potsdam í Þýskalandi. Í febrúar 2021 hóf hann doktorsnám í jarðfræði eftir að hafa hlotið boð um doktorsstöðu frá prófessor Steffen Mischke. Samhliða doktorsnámi sínu hefur Ahmed starfað í hlutastarfi við kennslu við Háskóla Íslands.