Bethany Louise Rogers, doktorsnemi við Sagnfræði- og heimspekideild
„Matur tengir saman ólíka þætti í menningunni og ólíka menningu. Allir kunna að meta mat! Í þessu rannsóknarverkefni næ ég að tengja saman áhuga minn á íslenskum miðöldum og nýuppgötvaða ást mína á matarsögu,“ segir Bethany Louise Rogers, nemi í sagnfræði, um doktorsverkefni sem hún hóf haustið 2016.
„Markmið verkefnisins er að rannsaka menningarog mannfræðilegt mikilvægi mjólkurafurða í norrænni menningu og greina söguleg tengsl manns og mjólkur í norrænni sögu, með sérstaka áherslu á tímabilið 1000-1500,“ bætir hún við.
Bethany kom hingað til lands árið 2011 frá Bandaríkjunum til þess að leggja stund á nám í íslenskum miðaldafræðum. Það var í því námi sem áhuginn á viðfangsefninu kviknaði. „Árið 2015 tók ég námskeiðið „Matur á miðöldum: Staðreyndir og viðhorf“ sem Andrea Marachi kenndi. Ég taldi að þetta yrði skemmtileg tilbreyting og bjóst alls ekki við hvaða heima Andrea myndi opna mér! Sá hluti sögunnar sem mér þótti síst spennandi varð allt í einu ótrúlega heillandi þegar horft var á hann frá sjónarhóli matar,“ útskýrir Bethany.
„Ég vonast til þess að rannsóknin varpi nýju ljósi á matarsögu Íslands, Danmerkur, Noregs og Svíþjóðar og að ég geti lagt fram nýja þekkingu um þróun og mikilvægi mjólkurvara innan skandinavískrar menningar á miðöldum.“
Hún hóf doktorsnám í sagnfræði strax að loknu námi í íslenskum miðaldafræðum og á von á því að fyrstu niðurstöður rannsóknarinnar líti dagsins ljós eftir um tvö til þrjú ár. „Ég vonast til þess að rannsóknin varpi nýju ljósi á matarsögu Íslands, Danmerkur, Noregs og Svíþjóðar og að ég geti lagt fram nýja þekkingu um þróun og mikilvægi mjólkurvara innan skandinavískrar menningar á miðöldum,“ segir hún.
Bethany bætir við að hún muni rýna í heimildir víða að úr Skandinavíu til þess að varpa ljósi á stöðu mjólkurvara í menningu og samfélagi miðalda. „Rannsóknin er líka innlegg í sögu Íslands því Íslendingar á miðöldum höfðu mun minni bjargráð í þessum efnum en aðrar norrænar þjóðir vegna legu landsins og einangrunar frá umheiminum. Þessi þáttur hefur ekki verið rannsakaður áður.“
Leiðbeinandi: Sverrir Jakobsson, prófessor við Sagnfræði- og heimspekideild