Eva H. Önnudóttir, nýdoktor við Stjórnmálafræðideild
Eva H. Önnudóttir er hægt og örugglega að skipa sér í hóp þekktustu stjórnmálafræðinga landsins en hún var tíður gestur á skjám landsmanna haustið 2016. Þar rýndi hún í nýjustu vendingar í stjórnmálunum í aðdraganda og eftirleik þingkosninganna hér á landi, eins og breytingar á fylgi flokka og ástæður þeirra. Það sama gerir hún m.a. í störfum sínum við Háskóla Íslands, ekki síst í Íslensku kosningarannsókninni sem hún hefur komið að undanfarin ár.
„Íslenska kosningarannsóknin snýst í grunninn um að skilja af hverju fólk kýs í kosningum, af hverju það velur tiltekinn flokk og af hverju fólk tekur þátt í stjórnmálum. Þetta árið var bætt við könnun meðan á kosningabaráttunni stóð haustið 2016 og er markmiðið að greina hvort og hvernig fjölmiðlaumræða hefur áhrif á líkur þess að kjósa ákveðinn stjórnmálaflokk,“ segir Eva.
Eva H. Önnudóttir
„Íslenska kosningarannsóknin snýst í grunninn um að skilja af hverju fólk kýs í kosningum, af hverju það velur tiltekinn flokk og af hverju fólk tekur þátt í stjórnmálum."
Íslenska kosningarannsóknin á sér yfir þriggja áratuga sögu en það var Ólafur Þ. Harðarson, prófessor í stjórnmálafræði, sem hóf hana árið 1983. „Hjartað í Íslensku kosningarannsókninni hefur ávallt verið spurningakönnun sem er send út eftir hverjar kosningar – en með tímanum hefur hún bæði stækkað og þroskast. Í dag erum við fjögur í stjórnunarteymi rannsóknarinnar, ég og Ólafur ásamt Huldu Þórisdóttur, dósent við Stjórnmálafræðideild, og Agnari Frey Helgasyni, verkefnisstjóra hjá Þjóðmálastofnun Háskóla Íslands,“ segir Eva.
„Í mínu námi og starfi hef ég alltaf haft mikinn áhuga á að skilja af hverju fólk hagar sér á tiltekinn hátt í stjórnmálum, af hverju það velur ákveðinn flokk og fyrir hvað sá flokkur stendur. Það má því segja að Íslenska kosningarannsóknin hafi valið mig, en ekki ég hana,“ segir Eva enn fremur.
Eva bendir á að rannsóknin sé ein sú viðamesta og elsta í tímaröð spurningakannana á Íslandi. „Með gögnum úr Íslensku kosningarannsókninni hefur verið hægt að greina hvort og hvaða breytingar hafa átt sér stað meðal íslenskra kjósenda. Hún hefur t.d. leitt í ljós að grundvallarbreytingar urðu á kosningahegðun íslenskra kjósenda árið 2009, sem sýnir sig meðal annars í því að gömlu flokkarnir fjórir, Sjálfstæðisflokkur, Samfylking, Framsókn og Vinstri græn, geta ekki lengur gengið að sínum kjósendum vísum í sama mæli og áður,“ segir Eva.
Gagnasöfnun vegna Íslensku kosningarannsóknarinnar fór fram í kjölfar þingkosninganna 29. október síðastliðinn og segir Eva að fyrstu niðurstaðna sé að vænta á vor- eða haustmánuðum ársins 2017.