Atli Arnarson, BS frá Hagfræðideild
Það hefur ekki farið fram hjá neinum að ferðamannastraumur til landsins hefur vaxið með hverju árinu. En hver ætli sé ástæðan fyrir því að Ísland er orðinn svo vinsæll áfangastaður? Atli Arnarson lauk hagfræðinámi við Háskóla Íslands vorið 2017 og ber BS-ritgerð hans titilinn „Gengisáhrif krónunnar á erlenda ferðamenn. Greining á vextinum í íslenskri ferðaþjónustu“.
Fjölgun ferðamanna hefur verið mikið í umræðunni að undanförnu og talað er um að það sé aftur orðið dýrt að heimsækja Ísland. Samt sem áður er ekkert lát á gestakomum. Þetta varð m.a. kveikjan að rannsókn Atla. „Það er alltaf gaman að skoða eitthvað sem fólkið er að tala um, það er auðvelt að hafa áhuga á því,“ segir hann.
Rannsóknin snerist um að skoða hvort og hvernig breytingar á gengi krónunnar eftir hrunið hefðu haft áhrif á komur erlendra ferðamanna og kortaveltu þeirra hér á landi. Rýnt var í hversu mikil áhrif aðrir þættir eins og eldgosið í Eyjafjallajökli og Evrópumótið í fótbolta í fyrrasumar kynnu að hafa á komur ferðamanna hingað til lands þar sem allra augu beindust að Íslandi á þeim tíma.
„Það er alltaf gaman að skoða eitthvað sem fólkið er að tala um, það er auðvelt að hafa áhuga á því.“
Í rannsókninni var notast við upplýsingar um kortaveltu erlendra ferðamanna ásamt því að teknar voru inn breytur frá Google Trends. Með hjálp Google Trends gat Atli séð hversu oft orðinu Iceland var flett upp á Google í kringum þessa stórviðburði og kom í ljós að Ísland hafði aldrei verið „gúglað“ jafnoft og í kringum eldgosið í Eyjafjallajökli en síðan kom stökk aftur í kringum Evrópumótið í fótbolta.
Rannsókn Atla leiddi í ljós að gengislækkun krónunnar, það að landið var ódýrara en áður, sagði ekki alla söguna um fjölgun ferðamanna hér á landi. Samkvæmt greiningunni höfðu eldgosið í Eyjafjallajökli og Evrópumótið mikil áhrif á komur ferðamanna. Þessir viðburðir voru góð kynning fyrir landið, löðuðu að ferðamenn og virtust hafa meiri áhrif en gengislækkunin, að sögn Atla. Hann bendir þó á að hann hafi beitt svokallaðri aðhvarfsgreiningu við rannsóknina, „og þær eru ekki fullkomnar. Sem dæmi er kortavelta ferðamanna ekki fullkominn mælikvarði á neyslu þeirra hér á landi þótt hún gefi ágætismynd af henni en þetta var niðurstaðan.“
Leiðbeinandi: Gylfi Zoëga, prófessor við Hagfræðideild.