Eiríkur Jónsson, prófessor við Lagadeild
Í fjölmiðlum berast reglulega fréttir af deilum manna um meintan stuld atvinnuleyndarmála, t.d. þegar einstaklingur hættir að vinna fyrir tiltekið fyrirtæki og fer að vinna fyrir keppinaut á sama markaði. Í lögum um eftirlit með viðskiptaháttum og markaðssetningu er ákvæði um vernd atvinnuleyndarmála og að því ákvæði beindi Eiríkur Jónsson, dósent í lögfræði, sjónum sínum í nýlegri rannsókn, sem tók jafnframt til ákvæðis um vernd auðkenna í sömu lögum.
„Markmiðið með rannsókninni var tvíþætt, annars vegar að greina þá efnislegu vernd sem í ákvæðunum felast, í ljósi fyrirliggjandi dóma- og stjórnsýsluframkvæmdar, en hins vegar að greina hvort núverandi fyrirkomulag, þar sem verndinni er fylgt eftir bæði fyrir dómi og á stjórnsýslustigi á vegum Neytendastofu, sé heppilegt,“ segir Eiríkur, sem vann rannsóknina í samstarfi við Halldóru Þorsteinsdóttur héraðsdómslögmann.
Eiríkur Jónsson
Í lögum um eftirlit með viðskiptaháttum og markaðssetningu er ákvæði um vernd atvinnuleyndarmála og að því ákvæði beindi Eiríkur Jónsson, dósent í lögfræði, sjónum sínum í nýlegri rannsókn, sem tók jafnframt til ákvæðis um vernd auðkenna í sömu lögum.
Eiríkur bendir á að ákvæði um vernd atvinnuleyndarmála og auðkenna hafi lengi verið í lögum hér á landi og talsvert reynt á þau. Lítið hafi hins vegar verið fjallað um ákvæðin í fræðiskrifum og það hafi því bæði haft hagnýtt og fræðilegt gildi að ráðast í það og meta hvort núverandi skipan mála teljist heppileg.
Í niðurstöðum rannsóknarinnar, sem birtust í Úlfljóti, tímariti laganema, á síðasta ári, leggja Eiríkur og Halldóra m.a. til breytingar á því hvernig vernd atvinnuleyndarmála er fylgt eftir. „Þannig leggjum við til, á grundvelli réttaröryggissjónarmiða og neytendaverndar- sjónarmiða, að eftirlit Neytendastofu verði aflagt og að framvegis verði eingöngu leyst úr deilum um meint brot gegn ákvæðinu fyrir dómi,“ útskýrir hann.
Eiríkur bendir á að rannsóknin hafi bæði fræðilegt og hagnýtt gildi „enda dregur hún upp mynd af þeirri vernd sem í ákvæðunum felst. Þá verður að telja að tillögur um það hvernig fyrirkomulagi stjórnvaldseftirlits á umræddu sviði sé best háttað hafi talsvert samfélagslegt gildi, sér í lagi mitt í allri þjóðfélagsumræðunni um skipulag stjórnsýslunnar og kostnað við hana,“ bendir hann að lokum á.