Baldvin Þór Bergsson, doktorsnemi við Stjórnmálafræðideild
Því hefur verið haldið fram að vald almennings hafi aukist með tilkomu samfélagsmiðla, nálægðar við valdhafa og aukinna möguleika á því að láta rödd sína heyrast. Ég er ekki sannfærður um að það sé alls kostar rétt,“ segir Baldvin Þór Bergsson, doktorsnemi í stjórnmálafræði, sem kannaði notkun stjórnmálaflokkanna á samfélagsmiðlum fyrir alþingiskosningarnar 2013 og samskipti stjórnmálamanna og almennings á þeim vettvangi.
Baldvin Þór Bergsson
„Því hefur verið haldið fram að vald almennings hafi aukist með tilkomu samfélagsmiðla, nálægðar við valdhafa og aukinna möguleika á því að láta rödd sína heyrast. Ég er ekki sannfærður um að það sé alls kostar rétt“
Hugmyndina að rannsókninni sækir hann til fjarlægra landa, nánar tiltekið til umræðu um mótmæli bæði í Íran og Egyptalandi. „Í báðum tilvikum hefur sú skoðun verið ráðandi að það hafi verið samfélagsmiðlar sem hrundu mótmælum af stað. Rannsóknir sýna hins vegar að sú skýring er í besta falli ýkt en í versta falli röng,“ bendir Baldvin á.
Baldvin hefur lengi starfað sem frétta- og dagskrárgerðarmaður hjá RÚV og segir að samskipti stjórnmálamanna og fjölmiðlamanna við almenning hafi lengi verið honum hugleikin. „Mikið er talað um þær breytingar sem eru að verða á fjölmiðlaumhverfinu og áhrifum almennings á umfjöllun þannig að mér finnst eðlilegt að skoða hvort fleiri raddir og aukinn aðgangur skili raunverulegum áhrifum,“ segir Baldvin.
Fyrstu niðurstöður rannsókna hans benda til að svo sé ekki. „Þær sýna að íslenskir stjórnmálaflokkar líta fyrst og fremst á samskiptamiðla sem tæki til að auka sýnileika og koma skilaboðum á framfæri. Áhrif almennings á stefnumótun og málefni í kosningabaráttunni í gegnum þessa miðla voru afar lítil,“ segir Baldvin og bætir við: „Hvað varðar Facebook þá held ég að mun meiri umræðu þurfi um hvað hún er og hvað hún er ekki. Facebook er ekki jafnopinn vettvangur og fólk telur og áhrif einstaklinga, þ.e. hvers og eins, þar eru hverfandi.“
Baldvin segir rannsóknina lið í að skilja pólitísk samskipti á 21. öldinni. „Við þurfum að kanna og skilja hver raunveruleg áhrif almennings eru. Það dugir ekki að halda því einfaldlega fram að vald fólks sé að aukast með tilkomu samfélagsmiðla, við þurfum að sýna fram á að svo sé. Lýðræðið er í stöðugri þróun og við þurfum bæði að skilja breytingar til lengri tíma og svokallaðar dægursveiflur, sem ef til vill hafa minni áhrif en við teljum þegar þær ganga yfir,“ segir hann að lokum.
Leiðbeinandi: Stefanía Óskarsdóttir, dósent við Stjórnmálafræðideild.