Loftslagsbreytingar og val á nytjaplöntum á Norðurlöndum

Bryndís Arndal Woods, doktorsnemi við Hagfræðideild - Loftslagsbreytingar og val á nytjaplöntum á Norðurlöndum

Loftslagsbreytingar eru ein stærsta áskorun nútímans og ekkert land fer varhluta af henni. Viðbrögð stjórnvalda við breytingunum skipta því sköpum en þar hyggst Bryndís Arndal Woods, doktorsnemi í hagfræði, leggja sitt af mörkum. Bryndís kemur við sögu í öðrum þætti í Fjársjóði framtíðar þar sem við fylgjumst með rannsóknum vísindamanna við Háskóla Íslands á loftslagsbreytingum og áhrifum þeirra á umhverfi okkar – ekki síst jökla. Einnig er fjallað um breytingar á vistkerfum landsins samfara hækkandi hitastigi og hvernig sjálfbærnimenntun getur komið að notum til að auka meðvitund um nauðsyn þess að vernda náttúruna.

„Ég þróa landnotkunarlíkan þar sem kannað er hvaða áhrif loftslagsbreytingar eru líklegar til að hafa á norrænan landbúnað með tilliti til vals bænda á nytjaplöntum. Þannig get ég sett fram mælikvarða á áhrif loftslagsbreytinga á val á nytjaplöntum og verðmæti lands í samhengi við þær,“ segir Bryndís.

Bryndís Arndal Woods

Landbúnaður er mikilvægur fyrir efnahagslíf á Norðurlöndum og rannsókn Bryndísar mun auka þekkingu á þeim áskorunum og tækifærum sem fylgja hlýnandi loftslagi.

„Ég vona að rannsóknir mínar auki skilning á mögulegum afleiðingum loftslagsbreytinga og styðji hagsmunaaðila í viðleitni sinni til að gera áætlanir fram í tímann og búa sig undir ýmsar breytingar,“ segir Bryndís. Fyrstu niðurstöður rannsóknarinnar sýna að umtalsverðar breytingar hafa, í aldanna rás, átt sér stað í vali á nytjaplöntum á Norðurlöndum.

„Markmið greiningar minnar er að áætla að hve miklu marki þessar breytingar skýrast af loftslagsbreytingum með því að bera saman loftslagsbreytur á borð við hitastig og úrkomu og breytur sem tengjast ekki loftslaginu, eins og stofnkostnað og verð á nytjaplöntum,“ segir Bryndís.

Verkefnið fékk styrk úr Háskólasjóði H/f Eimskipafélags Íslands árið 2013 og er samvinnuverkefni Háskóla Íslands og fleiri rannsóknastofnana innan norræna rannsóknaverkefnisins NORD-STAR sem ætlað er að hjálpa mönnum að bregðast við loftslagsbreytingum á Norðurlöndum.

„Markmiðið er að styrkja rannsóknir í því skyni að hjálpa norrænu ríkjunum að halda samkeppnisforskoti og takast á við áskoranir og tækifæri sem fylgja hlýnandi loftslagi,“ segir Bryndís.