Mennta- og barnamálaráðherra í heimsókn í Sögu
Inga Sæland mennta- og barnamálaráðherra heimsótti Menntavísindasvið í Sögu þriðjudaginn 17. febrúar ásamt samstarfsfólki sínu úr mennta- og barnamálaráðuneyti og kynnti sér starfsemi Menntavísindasviðs, kennaramenntun og menntarannsóknir ásamt því að funda með stjórnendum Háskólans og stjórn Menntavísindasviðs um áframhaldandi samstarf um eflingu menntakerfisins.
Silja Bára Ómarsdóttir, rektor Háskóla Íslands, tók á móti Ingu í Sögu ásamt Kolbrúnu Þ. Pálsdóttur, forseta Menntavísindasviðs, og öllum deildarforsetum Menntavísindasviðs. Ráðherra voru sýnd ný húsakynni Sögu, þar á meðal þau fjölbreyttu kennslu- og námsrými á vegum Menntavísindasviðs sem finna má í húsinu. Þar má nefna sértæk námsrými fyrir kennslu list- og verkgreina á borð við tónmennt, leiklist og hönnun og textíl og sérhönnuð rými fyrir kennslu í menntunarfræði yngri barna, náttúruvísinda og stærðfræði auk þess sem henni var gefin innsýn í fjölbreytta kennsluhætti og kennaramenntun MVS á öllum skólastigum, en velja má á milli 19 námsleiða í grunnnámi og 57 í framhaldsnámi.
Í Sögu fundaði ráðherra með rektor, aðstoðarrektorum, forsetum deilda og rekstrarstjóra Menntavísindasviðs ásamt ráðuneytisstjóra og sérfræðingum mennta- og barnamálaráðuneytis um lykilhlutverk Menntavísindasviðs HÍ í íslensku menntakerfi en sviðið menntar kennara og annað fagfólk, stundar öflugar menntarannsóknir og leiðir þróunar- og nýsköpunarverkefni í nánu samstarfi við stjórnvöld, sveitarfélög og skólasamfélagið. Rætt var um skipulag og inntak kennaramenntunar, skort á menntuðum kennurum á vettvangi, umbætur í kennaramenntun undanfarin ár, mikilvægi starfsþróunar, aukinn stuðning við nýliðun kennara á vettvangi og framtíðarhorfur kennaramenntunar.
Enn fremur var rætt um læsi í víðum skilningi og lestrarkennslu, mikilvægi Menntarannsóknarsjóðs, framhaldsnám fyrir stjórnendur og leiðtoga í menntakerfinu og að grípa þurfi til samstilltra aðgerða um fjölgun kennara á öllum skólastigum. Þar mætti byggja á lærdómi af samstilltu átaki sem stóð yfir 2019 til 2024 og skilaði fjölgun kennaranema. Þær aðgerðir byggðust á hvatningarstyrkjum til kennaranema, innleiðingu launaðs starfsnáms og nýrrar framhaldsnámsleiðar, MT (e. Master of Teaching). Þá hafi aðgerðir á borð við innleiðingu fagháskólanáms í leikskólakennarafræði og raunfærnimat í leikskólakennaranámi skilað fleiri brautskráðum leikskólafræðikennurum frá HÍ.
Jafnframt var rætt um að auka markvissa starfsþróun og fræðslu á landsvísu, t.d. í formi Menntafléttu, Farhleðslu og fleiri möguleika fyrir sveitarfélög, skóla og kennara, að efla stuðning við nýliðun kennara í starfi á vettvangi og nýta menntarannsóknir sem grunn að stefnumótun og ákvarðanatöku í menntamálum.
Fleiri myndir frá heimsókninni má finna hér að neðan. Þær tók Kristinn Ingvarsson.
