Menntabúðir: Læsi, tækni og skapandi starf í Sögu

Fimmtudaginn 26. mars 2026 heldur Mixtúra, sköpunar- og upplýsingatækniver skóla- og frístundasviðs Reykjavíkur, árlegar Menntabúðir í samstarfi við Menntavísindasvið Háskóla Íslands og fleiri góða samstarfsaðila.  
 
Menntabúðir er lifandi og óformleg samkoma þar sem fólk  kemur saman til að miðla hugmyndum, deila reynslu, sýna verkefni og kynnast nýjum nálgunum í námi og kennslu. 
Þetta er vettvangur fyrir samtal, innblástur og tengingar.  Gestir geta tekið þátt með margvíslegum hætti, hvort sem er með kynningu eða einfaldlega með því að rölta á milli, skoða og eiga samtöl. 
 
Viðburðurinn hefst kl. 14.00 með styrkveitingu úr Styrktar- og rannsóknarsjóði Þuríðar J. Kristjánsdóttur. Silja Bára Ómarsdóttir, rektor Háskóla Íslands, afhendir styrkinn á 1. hæð í Sögu. Styrkveitingin fer fram samhliða opnun Menntabúða, sem stendur yfir frá kl. 14.00 til 17.00. 

Í ár langar okkur til að einblína á læsi, tækni og skapandi skóla-  og frístundastarf.  Því er leitað eftir óformlegum kynningum á verkefnum, verkfærum eða námsefni sem nýtist börnum og ungmennum á Íslandi.

Dæmi um kynningar eru: 

• Eitthvað sem þú getur kennt okkur og nýtist í skóla- og frístundastarfi. 

• Eitthvað sem tengist læsi í víðu samhengi. 

• Kennslulausn, verkfæri eða námsefni sem þú notar í starfi með börnum og ungmennum. 

• Verkefni eða lausnir sem þú ert að þróa. 

• Hefðbundið eða árlegt verkefni sem þér finnst sniðugt. 

• Annað sem þér finnst gagnlegt eða áhugavert.   

Allar kynningar fara fram í opnu rými á Menntavísindasviði HÍ (Sögutorg á 1. hæð og Námsgagnaver á 2. hæð) og fá öll afnot af borði og veggplássi (sé þess óskað). Ekki er nauðsynlegt að vera með kynningu allan tímann.  

→ Skrá verkefni til leiks á Menntabúðum 

Skráningarfrestur verkefna er til og með 6. mars 2026  

Stutt myndband frá menntabúðum vorið 2024 

Sjáumst á Menntabúðum 26. mars!