Hugvísindaþing 2026
Hugvísindaþing verður haldið í Háskóla Íslands dagana 13. og 14. mars með 37 málstofum og 150 fyrirlestrum. Meðal þess sem fjallað verður um í ár er „dómstóll götunnar“, sakamál á tímabilinu 1600-1900, skáldkonan Nína Björk Árnadóttir, kvikmyndagerðarmaðurinn Ósvald Knudsen, kosningaréttur, kalda stríðið, vélrænn textalestur, orðatiltæki, hugsandi börn og bækur fyrir börn, seljabúskapur og rímur. Hugvísindaþing er öllum opið og aðgangur ókeypis. Dagskrá þingsins má nálgast hér.
Magnús Þorkell Bernharðsson flytur heiðursfyrirlestur Hugvísindaþings í ár en hann hefur starfað í bandarísku háskólaumhverfi í um 30 ár. Hann mun fjalla um þær miklu breytingar sem þar hafa orðið að undanförnu, ekki síst út frá hans fræðigrein, sem er saga Mið-Austurlanda.
Ólöf Garðarsdóttir, forseti Hugvísindasviðs, setur þingið í Hátíðasal í Aðalbyggingu Háskóla Íslands, föstudaginn 13. mars kl. 12:00. Í kjölfarið flytur Magnús Þorkell Bernharðsson, miðausturlandafræðingur við Williams College í Bandaríkjunum og gistiprófessor við Guðfræði-og trúarbragðafræðideild HÍ, hátíðarfyrirlestur sem hann nefnir Hvað má og hvað má ekki? Akademískt frelsi á tímamótum. Í fyrirlestrinum mun Magnús fjalla um stórfelldar breytingar sem eru að verða á bandarísku háskólaumhverfi í kjölfar stríðsins í Gaza 2023, endurkjörs Donalds Trump 2024 og nýrra upplýsinga úr Epstein-skjölunum. Sjá nánar um fyrirlesturinn.
