Meistaravörn í lyfjafræði - Margrét Sif Sigurðardóttir

Miðvikudaginn 15. maí ver Margrét Sif Sigurðardóttir MS verkefni sitt í lyfjafræði við Lyfjafræðideild Háskóla Íslands. Verkefnið ber heitið Use of hypnotics, sedatives and anxiolytics in relation to multimorbidity in 2009-2012

Prófdómarar eru Ólafur B. Einarsson, verkefnisstjóri hjá Embætti landlæknis og Pétur S. Gunnarsson, lektor við Lyfjafræðideild.

Leiðbeinendur Margrétar Sifjar voru Kristján Linnet og dr. Lárus Steinþór Guðmundsson, dósent við Lyfjafræðideild, sem einnig var umsjónarkennari verkefnisins.

Ágrip af rannsókn

Notkun svefn- og kvíðastillandi lyfja er meiri á Íslandi en á hinum Norðurlöndunum. Sér í lagi er notkun benzodiazepine-skyldra lyfja (Z-lyf) afgerandi meiri hér en í hinum löndunum. Margir glíma við svefnleysi samhliða öðrum krónískum sjúkdómum svo sem geðsjúkdómum og verkjum. Markmið þessarar rannsóknar var að skoða notkun svefn- og kvíðastillandi lyfja meðal fjölveikra sjúklinga með áherslu á geð- og verkjagreiningar. Niðurstöður sýndu að algengi þriggja ára Z-lyfjanotkunar var hátt meðal sjúklinga með fjölsjúkleika og jókst algengið með hverri viðbótargreiningu. Skilgreindir dagskammtar (DDDs) af Z-lyfjum jukust þó ekki milli ára meðal sjúklinga sem leystu út lyf samfellt á þriggja ára tímabili.

Um nemandann

Margrét Sif Sigurðardóttir fæddist þann 3. febrúar árið 1994 í Reykjavík og ólst þar upp. Foreldrar hennar eru Huld Konráðsdóttir og Sigurður Tómas Magnússon. Hún lauk stúdentsprófi af eðlisfræðibraut frá Verzlunarskóla Íslands árið 2014 og hóf nám við lyfjafræðideild Háskóla Íslands sama ár. Margrét hefur undanfarin ár verið sumarstarfsmaður hjá Vistor og unnið í hlutastarfi hjá Lyfju.