Doktorsvörn í eðlisfræði - Kevin Tanguy Elian Dini

Doktorsefni: Kevin Tanguy Elian Dini

Heiti ritgerðar: Ljósfræðileg stýring leiðnieiginleika tvívíðra Dirac kerfa

Andmælendur:
Dr. Polina Kuzhir, stjórnandi við NanoElectroMagnetics Laboratory, Belarusian State University.
Dr. Andre Xuereb, dósent, University of Malta

Leiðbeinandi: Ivan Shelykh, prófessor við Raunvísindadeild Háskóla Íslands

Einnig í doktorsnefnd:
Dr. Hafliði Pétur Gíslason, prófessor við Raunvísindadeild Háskóla Íslands
Dr. Viðar Guðmundsson, prófessor við Raunvísindadeild Háskóla Íslands
Dr. Andrei Manolescu, prófessor við Háskólann í Reykjavik

Doktorsvörn stýrir: Dr. Oddur Ingólfsson, prófessor og deildarforseti Raunvísindadeildar Háskóla Íslands

Ágrip

Víxlverkun milli ljóss og efnis er umræðuefni innan eðlisfræðinnar sem hefur stækkað ört undanfarna áratugi og orðið að einu mikilvægasta rannsóknarsviði. Sviðið blandar saman áhrifum úr þéttefnisfræði og skammtaljósfræði og hefur sína einstöku eiginleika. Með því að skoða hvaða eiginleika þessara tveggja sviða er best að setja saman, getur leitt til nýjunga og betri skilnings. Í þessari ritgerð, rannsökum við fræðilega hvaða áhrif skautað rafsegulsvið hefur á einum þekktasta klasa tvíviðra kerfa: Dirac efni. Til að ná markmiðinu, skoðum við fyrst áhrif svokallaðs klæðningarsviðs á einfaldasta efninu, einu lagi af grafíni. Síðan er farið í flóknari kerfi sem eru Dirac efni með orkugeil eins og hliðarmálma-díkalkógeníðar (e. transition metal dichalcogenides) og grafín sem hefur vaxið á undirlagi úr bóron-nítriði eða rafeindir sem hafa massa í tveggja laga grafíni. Loks skoðum við aðferð til að stýra eiginleikum rafeinda með ljósi í grafíni og að sía rafeindir þar eftir dalavísi þeirra. Til þess að framkvæma þessa vinnu, er notast við tvö verkfæri til að meðhöndla kerfi sem eru lotubundin í tíma. Eitt er Floquet-Magnus formalisminn og hitt er hermun rafeinda í Dirac kerfum með Gauss bylgjupókkum.

Um doktorsefnið

Kevin Dini er franskur ríkisborgari sem hefur klárað fyrstu tvö stig háskólanáms við Blaise Pascal háskólann í Clermont Ferrand, Frakklandi. Eftir að hafa lært öreindafræði fyrst um sinn, ákvað hann að breyta um stefnu og læra þéttefnisfræði.

Viðburður á Facebook