Doktorsvörn í byggingarverkfræði - Victor Moises Hernández Aguirre

Streymi

Doktorsefni: Victor Moises Hernández Aguirre

Heiti ritgerðar: Sterkar yfirborðshreyfingar á Íslandi af völdum tektónískra og eldfjallajarðskjálfta: frá reynslubundinni líkanagerð til eðlisfræðigrundaðra hermana (Tectonic and volcanic strong ground motion in Iceland: from empirical modelling to physics-based simulations)

Andmælendur:
Dr. Carmine Galasso, prófessor við University College London, Bretland
Dr. Karim Tarbali, dósent við Université Paris-Saclay, Frakklandi

Leiðbeinandi: Dr. Rajesh Rupakhety, prófessor við Umhverfis- og byggingarverkfræðideild Háskóla Íslands

Einnig í doktorsnefnd:
Dr. Roberto Paolucci, prófessor við Umhverfis- og byggingarverkfræðideild Politecnico di Milano, Ítalíu
Dr. Bjarni Bessason, prófessor við Umhverfis- og byggingarverkfræðideild Háskóla Íslands
Dr. Sigurður Erlingsson, prófessor við Umhverfis- og byggingarverkfræðideild Háskóla Íslands
Dr. Chiara Smerzini, dósent við Umhverfis- og byggingarverkfræðideild Politecnico di Milano, Ítalíu

Doktorsvörn stýrir: Dr. Hrund Ólöf Andradóttir, prófessor og deildarforseti Umhverfis- og byggingaverkfræðideildar HÍ 

Um er að ræða sameiginlega doktorsgráðu við Háskóla Íslands og Politecnico di Milano, Ítalíu.

Ágrip

Í þessari doktorsritgerð er fjallað um þróuð töluleg reiknilíkön og aðferðir til að herma yfirborðshreyfingar í jarðskjálftum sem nýtast við mat a jarðskjálftavá á Íslandi og víðar. Þrjú meginviðfangsefni voru skoðuð. Fyrst var þrívíð seismísk svörun setskálar (basin) Mexikóborgar rannsökuð með eðlisfræðileg hermilíkön (PBS). Í öðru viðfangsefni var sjónunum beint að kröftugum jarðskjálftahreyfingum af völdum eldvirkni- og jarðhniksskjálfta á Reykjanesskaga. Greining á skráðum gögnum nýlegra atburða sýnir óvenjulega há útgildi yfirborðshröðunar sem og há svörunarrófsgildi fyrir langa sveiflutíma, í sumum tilvikum gildi sem er hærri en fyrirliggjandi staðalróf fyrir svæðið með 475 ára endurkomutíma. þróað var dvínunarlíkan (GMM) fyrir eldvirkniskjálfta á Íslandi, sem er gagnlegt verkfæri til að bæta og meta jarðskjálftavá á Reykjanesskaga og á höfuðborgarsvæðinu, sem og á öðrum erlendum eldvirknisvæðum. Í þriðja hluti verksins var PBS-aðferðfræðin betrumbætt bæði með fullkomnari upptakalíkani og með betri hermun á breiðbandsáhrifum jarðskjálftahreyfinga. Nýtt brotalíkan var þróað, sem er byggt upp og samsett úr smærri upptakalíkönum sem geta hvert og eitt verið ólík að eðli og gerð og þannig gert mögulegt að herma, hálf-sjálfvirkt, flóknar brothreyfingar í upptökum. Líkanið var sannreynt með gögnum úr Suðurlandsskjálftunum árið 2000. Líkanið gerir mögulega að taka mið af óvissu i upptökum sem og herma hátíðni jarðskjálftahreyfingar. Svokölluð ANN2BB (Artifical Neural Network to BroadBand) blendingshermiaðferð var notuð og betrumbætt þar sem þekkt hátíðnieinkenni í skráðum yfirborðshreyfingum sem birtast í alþjóðleg gagnsöfnum voru uppfærð með hátíðnieinkennum úr takmörkuðu, staðbundnu gagnasafni. Í heildina gera þær endurbætur, sem fjallað er um í þessari ritgerð, á tölvulíkönum til að herma yfirborðshreyfingar í jarðskjálftum, notkun þeirra áreiðanlegri og nýtanlegri við fjölbreyttari aðstæður. Rannsóknin hefur skilað betri skilningi á: einkennum yfirborðshreyfinga í setskálum; meðhöndlun og líkangerð af jarðskjálftum vegna eldvirkni við sem nýtist við mat á jarðskjálftavá; og á fínstillingu og kvörðun á eðlisfræðilegum tölvulíkönum til að herma jarðskjálftahreyfingar.

Um doktorsefnið

Victor Moises Hernández Aguirre (fæddur 1995 í Mexíkó) er byggingarverkfræðingur sem sérhæfir sig í jarðskjálftaverkfræði. Hann er með B.Eng.-gráðu í verkfræði frá Universidad Nacional Autónoma de México (UNAM) og M.Sc.-gráðu frá Politecnico di Milano. Hann hefur starfað sem jarðtækniverkfræðingur í Mexíkó og sinnt ráðgjöf við verkefni á sviði jarðskjálftaverkfræði. Meðan á doktorsnámi hans við Háskóla Íslands stóð tók hann þátt í kennslu og leiðsögn nemenda í byggingarverkfræði. Utan vinnu nýtur hann þess að dvelja úti í náttúrunni.