Tveir veglegir styrkir til Stjórnmálafræðideildar
![Tveir veglegir styrkir til Stjórnmálafræðideildar - á vefsíðu Háskóla Íslands](https://www.hi.is/sites/default/files/styles/efsta_mynd___fr_ttum/public/stjori/bakgrunnsmyndir2/1920_KRI_haskolatorg_180913_002.jpg?itok=Csp1LxdL)
Silja Bára Ómarsdóttir, prófessor við Stjórnmálafræðideild, og Jón Gunnar Ólafsson, nýdoktor við deildina, hlutu nýverið styrki úr Rannsóknasjóði. Alls bárust 402 gildar umsóknir í sjóðinn og voru 82 þeirra styrktar eða rúmlega 20% umsókna.
Silja Bára hlaut þriggja ára verkefnisstyrk fyrir verkefnið „Árangur gegn alþjóðlegu bakslagi: Þungunarrof á Íslandi og Írlandi“. Verkefnið fjármagnar stöðu doktorsnema, meistaranema og nýdoktors sem munu bera saman breytingar á lagaumgjörð um þungunarrof á Írlandi, Íslandi og Norður-Írlandi og viðnám íhaldsafla gegn þeim.
Jón Gunnar hlaut þriggja ára nýdoktorsstyrk fyrir verkefnið „Fjölmiðlar, lýðræði og falsfréttir á Íslandi“. Í verkefninu mun hann meðal annars skoða stöðu fjölmiðla á Íslandi í dag í alþjóðlegu samhengi og hvernig dreifing rangra og misvísandi upplýsinga á sér stað í síbreytilegu tækniumhverfi.
Stjórnmálafræðideild óskar Silju Báru og Jóni Gunnari innilega til hamingju með styrkina!