Doktorsvörn á Menntavísindasviði - Artëm Ingmar Benediktsson

Doktorsefni:  Artëm Ingmar Benediktsson

Heiti ritgerðar: “It is not only the Teacher who is Talking; It is an Exchange” Immigrant Students’ Experiences of Learning Environments and Teaching Methods used in Icelandic Universities

Andmælendur: Anne Holmen, prófessor Center for Internationalisering og Parallelsproglighed, Kaupmannahafnarháskóla, og dr. Jim Cummins, prófessor emeritus við University of Toronto, Kanada.

Leiðbeinandi: Hanna Ragnarsdóttir, prófessor við Menntavísindasvið, og meðleiðbeinandi dr. Lise Iversen Kulbrandstad, prófessor við Inland Norway University of Applied Sciences, Noregi.

Aðrir í doktorsnefnd: dr. Guðrún Geirsdóttir, dósent og deildarstjóri Kennslumiðstöðvar Háskóla Íslands.

Doktorsvörn stýrir: Dr. Ingólfur Ásgeir Jóhannesson, prófessor og forseti Deildar menntunar og margbreytileika Menntavísindasviðs

Vegna fjöldatakmarkana geta einungis 50 manns verið viðstaddir vörnina í Hátíðasalnum, en hægt verður að fylgjast með vörninni í beinni útsendingu

Um verkefnið

Tilgangur þessa doktorsverkefnis er að skoða reynslu innflytjenda af kennsluaðferðum og námsumhverfi í þremur íslenskum háskólum. Meginmarkmiðið er að veita innsýn í reynslu innflytjenda af háskólanámi og athuga hvaða kennsluaðferðir þeir telja að henti þeim til náms. Enn fremur er markmið verkefnisins að skoða helstu áskoranirnar, þar á meðal tungumálaörðugleika sem innflytjendur takast á við í námsferlinu og hvaða stoðþjónusta stendur þeim til boða.

Fræðilegur bakgrunnur rannsóknarinnar er þríþættur og byggir á hugsmíðahyggju, hugmyndafræði fjölmenningarlegrar menntunar og annarsmálsfræði. Aðaláherslan er lögð á nemendamiðaða og menningarmiðaða nálgun á kennslu, sem hvetur nemendur til að vera sjálfstæða og virka námsmenn, að nota fyrri reynslu sína í námsferlinu og að deila vitneskju með samnemum og kennurum.

Þetta verkefni er eigindleg rannsókn þar sem gagna er aflað með rýnihópum og ítarlegum einstaklingsviðtölum við innflytjendur. Þátttakendur eru fjörutíu og einn háskólanemi sem eru í grunnnámi við einn af þeim þremur háskólum á Íslandi sem rannsóknin náði til.

Rannsóknin varpar ljósi á mikilvægi þess að hverfa frá hefðbundinni kennslu sem byggir á fyrirlestri í átt að nemendamiðuðum aðferðum við kennslu, svo sem menningarmiðaðri kennslu, menningarmiðuðu námsmati og stuðningi. Líklegt er að slíkir kennsluhættir skapi styrkandi námsumhverfi þar sem sérhver einstaklingur hefur jöfn tækifæri, jafnan aðgang að menntun og telur sig vera metinn að verðleikum. Niðurstöðurnar hafa verið birtar í fimm fræðigreinum sem eru hluti af doktorsverkefninu.

Um doktorsefnið

Artëm Ingmar Benediktsson er fæddur í Rússlandi árið 1987. Hann lauk BS-gráðu í jarðfræði frá Peoples‘ Friendship University of Russia árið 2009 í Moskvu; BA-gráðu í dönsku frá Háskóla Íslands árið 2013 og MA-gráðu í Norðurlandafræðum frá Háskóla Íslands árið 2015. Artëm hefur mikinn áhuga á tungumálum og kann öll norrænu tungumálin, rússnesku, kínversku og ensku. Artëm hóf doktorsnám árið 2016 og beindist rannsókn hans að upplifun og reynslu nemenda af erlendum uppruna af kennsluaðferðum í háskólum á Íslandi. Samhliða doktorsnáminu hefur Artëm stundað nám í kínverskum fræðum og almennum málvísindum við Hugvísindasvið HÍ og stefnir að útskrift úr því námi í júní 2020. Artëm hefur mikla reynslu af mismunandi uppbyggingu náms og námsumhverfi enda stundaði hann á námsferlinum skiptinám í Danmörku, Noregi og Kína. Þar að auki keppti Artëm fyrir Íslands hönd í alþjóðlegu keppninni Chinese Bridge sumarið 2018, sem haldin var í Beijing og Changsha í Kína.