Meistaravörn í lyfjafræði - Hólmfríður Gylfadóttir

Miðvikudaginn 15. maí ver Hólmfríður Gylfadóttir MS verkefni sitt í lyfjafræði við Lyfjafræðideild Háskóla Íslands. Verkefnið ber heitið Development of an Erythromycin – Enzyme compatible formulation

Prófdómarar eru dr. Hákon Hrafn Sigurðsson, prófessor við Lyfjafræðideild og dr. Sveinbjörn Gizurarson, prófessor við Lyfjafræðideild.

Leiðbeinendur Hólmfríðar voru dr. Reynir Scheving og dr. Bjarki Stefánsson, sérfræðingar hjá Zymetech. Umsjónarkennari verkefnisins var dr. Bergþóra Sigríður Snorradóttir, lektor við Lyfjafræðideild.

Ágrip af rannsókn

Zymetech er með einkaleyfi á því að þróa samsetta meðferð gegn örveruþekju-sýkingum sem inniheldur eitt eða fleiri sýklalyf og ensímið trypsin úr Atlantshafsþorski. Helstu markmið verkefnisins var að þróa erythromycin – ensím samrýmanlega formúleringu í samstarfi með Zymetech með því að auka leysni erythromycins og kanna hvort erythromycin og trypsin voru stöðug í mismunandi samsetningum af formúleringum. Magngreiningaraðferð var þróuð á UHPLC-CAD fyrir erythromycin og leysni erythromycins jókst með HPbCD, Tween 80 og própýlen glykól. Fjórar mismunandi formúleringar voru útbúnar með engu eða einu af þessum hjálparefnum og erythromycin var stöðugt í þeim öllum. Trypsin var stöðugast í formúleringunni sem innihélt HPbCD en óstöðugast í formúleringunni með própýlen glykól.

Um nemandann

Hólmfríður Gylfadóttir fæddist þann 1. mars árið 1992 í Lundi í Svíþjóð og er dóttir hjónanna Gylfa Óskarssonar og Guðrúnar Sigmundsdóttur. Hólmfríður kláraði stúdentspróf frá Verslunarskóla Íslands árið 2012 og stundaði nám við lyfjafræði í Háskóla Íslands frá 2014-2019. Á meðan námstímanum stóð starfaði hún hjá Barnalæknaþjónustunni í Domus Medica, í SA lyfjaskömmtun og sem aðstoðarlyfjafræðingur í Apótekaranum í Austurveri. Eftir útskrift mun Hólmfríður starfa sem lyfjafræðingur hjá SA lyfjaskömmtun. Sambýlismaður Hólmfríðar er Einar Sigurvinsson, meistaranemi í opinberri stjórnsýslu.