Doktorsvörn í líf- og læknavísindum - Linda Bára Lýðsdóttir

Linda Bára Lýðsdóttir, sálfræðingur, ver doktorsritgerð sína í líf- og læknavísindum við Læknadeild Háskóla Íslands. Ritgerðin ber heitið: Geðheilsa íslenskra kvenna á meðgöngu (Mental health in Icelandic women during pregnancy). 

Andmælendur eru dr. John Cox, prófessor emeritus í sálfræði við Keele University í Englandi, og dr. Arianna Di Florio, klínískur dósent við Háskólann í Cardiff, Wales.

Umsjónarkennari og leiðbeinandi var dr. Jón Fr. Sigurðsson, prófessor við Læknadeild Háskóla Íslands og sálfræðideild Háskólans í Reykjavík, og dr. Louise Howard, prófessor við King‘s College í London.

Engilbert Sigurðsson, prófessor og forseti Læknadeildar Háskóla Íslands, stjórnar athöfninni.

Ágrip af rannsókn

Gerð var langtímarannsókn á líðan íslenskra kvenna á meðgöngu og eftir barnsburð í samstarfi við Heilsugæslu höfuðborgarsvæðisins, Heilbrigðisstofnun Norðurlands á Akureyri og Landspítala. Alls tóku 2523 verðandi mæður þátt í rannsókninni þar sem þær voru beðnar um að svara ýmsum sjálfsmatslistum, m.a. um þunglyndiseinkenni, kvíða og streitu. Í framhaldi af því voru tekin ítarleg greiningarviðtöl við 521 konu, sem fundu fyrir einkennum þunglyndis og/eða kvíða á meðgöngunni eða voru valdar í samanburðarhóp kvenna sem ekki fundu fyrir slíkum einkennum. Meginmarkmið rannsóknarinnar var að skoða geðheilsu íslenskra kvenna á 16. viku meðgöngu og kortleggja mögulega áhættuþætti. Niðurstöður leiddu í ljós mikilvægi þess að heilbrigðisstarfsmenn einblíni ekki eingöngu á þunglyndi hjá konum sem skýra frá vanlíðan á meðgöngu heldur hafi í huga að um kvíða, geðhvörf eða aðrar geðraskanir geti verið að ræða. Jafnframt er mikilvægt að gera sér grein fyrir því að um tímabundna vanlíðan geti verið að ræða, sem ekki þarfnast inngripa. Þá eru ekki allar konur tilbúnar til að segja frá vanlíðan sinni og því er mikilvægt að vera sífellt vakandi fyrir andlegri líðan kvenna á meðgöngu. Niðurstöður sýndu jafnframt að það að hafa fyrri sögu um þunglyndi, fá lítinn stuðning frá sínu nánast umhverfi, hafa orðið fyrir ofbeldi í hjónabandi, hafa átt í fjárhagserfiðleikum og/eða eiga maka sem hefur verið að kljást við alvarlegan vímuefnavanda, eykur líkur á andlegum erfiðleikum eins og þunglyndi og/eða kvíða á meðgöngu.

Um doktorsefnið

Linda Bára Lýðsdóttir er fædd árið 1967 í Reykjavík. Hún lauk stúdentsprófi af náttúrufræðibraut Menntaskólans við Hamrahlíð árið 1989, BA-prófi í sálfræði frá Háskóla Íslands árið 1994 og sérnámi í klínískri sálfræði við Háskólann í Amsterdam árið 1998. Á árunum frá 1999 til 2005 vann hún við stjórnendaráðgjöf hjá CAPACENT/IMG-Deloitte og frá 2005 til 2016 vann hún sem sálfræðingur á Landspítalanum, fyrst á göngudeild og bráðaþjónustu geðsviðs og síðar á kvennadeild spítalans. Frá árinu 2016 hefur hún sinnt starfi sviðsstjóra hjá VIRK starfsendurhæfingarsjóði. Linda Bára sinnti stundakennslu við Háskóla Íslands á árunum frá 1999 til 2008 og við Háskólann í Reykjavík frá árinu 2009 til dagsins í dag. Linda Bára er dóttir Lýðs Benediktssonar og Helgu Valdimarsdóttur. Eiginmaður Lindu Báru er Hafsteinn Bragason, mannauðsstjóri hjá Íslandsbanka, og eiga þau drengina Lýð og Hlyn.