Doktorsvörn í lyfjafræði - Anna Bryndís Blöndal

Anna Bryndís Blöndal ver doktorsritgerð sína í lyfjafræði við Lyfjafræðideild Háskóla Íslands. Ritgerðin ber heitið:

Innleiðing lyfjafræðilegrar umsjár í heilsugæslu á Íslandi - Bringing pharmaceutical care to primary care in Iceland

Andmælendur eru dr. Helga Garðarsdóttir, dósent við Háskólann í Utrecht, og Guðlaug Þórsdóttir, öldrunarlæknir við Landspítala Háskólasjúkrahús.

Umsjónarkennari og aðalleiðbeinandi var dr. Sveinbjörn Gizurarson, prófessor við Lyfjafræðideild Háskóla Íslands, og meðleiðbeinandi var dr. Anna Birna Almarsdóttir, prófessor við Kaupmannahafnarháskóla. Að auki sátu í doktorsnefnd Aðalsteinn Guðmundsson, lyf- og öldrunarlæknir,  Jón Steinar Jónsson heimilislæknir, og Sofia Kalvemark Sporrong, aðstoðarprófessor við Kaupmannahafnarháskóla.

Dr. Hákon Hrafn Sigurðsson, prófessor og forseti Lyfjafræðideildar Háskóla Íslands, stjórnar athöfninni sem fer fram á íslensku.

Ágrip af rannsókn

Lyfjafræðileg umsjá er þjónusta sem stuðlar að því að skilgreina markmið lyfjameðferðar fyrir sjúkling og leita bestu leiða til að ná þeim markmiðum og felur það oftast í sér samvinnu milli lyfjafræðings, læknis og sjúklings. Á undanförnum áratugum hafa lyfjafræðingar erlendis verið að útvíkka starfssvið sitt með því að veita lyfjafræðilega umsjá í samstarfi við aðra heilbrigðisstarfsmenn en þó er misjafnt milli landa hversu mikið og útbreitt það er.

Markmið rannsóknarinnar var annars vegar að rannsaka viðhorf íslenskra heimilislækna til lyfjafræðinga og núverandi samstarf lyfjafræðinga og heimilislækna í ummönnun sjúklinga og hins vegar að kynna fyrir þeim í hverju lyfjafræðileg umsjá felst. Auk þess að greina nánar þær athugasemdir sem rannsakandinn/lyfjafræðingurinn gerði þegar hann veitti þjónustuna.

Notast var við aðferðafræði umbótarannsókna/starfendarannsókna (e. Action Research) þar sem rannsakandinn, sem er lyfjafræðingur var bæði rannsakandi og þátttakandi. Aðferðir sem notast var við voru hálfstöðluð einstaklingsviðtöl, lyfjafræðileg umsjáríhlutun (þar sem rannsakandi veitti lyfjafræðilega umsjá til skjólstæðinga heimilislækna), fundir og rannsóknarnótur á vettvangi. Ritgerðin byggir á þremur greinum birtum í ritrýndum vísindatímaritum.

Niðurstöðum þessara rannsókna sýna að 1) heimilislæknar virðast almennt ekki þekkja til lyfjafræðinga né hæfni þeirra í umönnun sjúklinga; 2) þegar þjónustan lyfjafræðileg umsjá var kynnt fyrir heimilislæknum voru þeir ánægðir með samstarfið og afrakstur þess; 3) þeir samþykktu tilmæli og athugasemdir lyfjafræðingsins um lyfjameðferðir skjólstæðinganna sinna að mestu leyti; 4) heimilislæknum fannst að lyfjafræðingar ættu að vera hluti af teyminu sem starfar inni á heilsugæslunni í framtíðinni.

Um doktorsefnið

Anna Bryndís Blöndal er fædd á Akureyri árið 1978. Hún er gift Haraldi Líndal Péturssyni og saman eiga þau fjögur börn, Pétur Breka 17 ára, Köru Kristínu 14 ára, Hilmu Hrönn 9 ára og Gunnar Áka 6 ára. Anna Bryndís lauk kandídatsprófi í lyfjafræði frá Lyfjafræðideild Háskóla Íslands árið 2006 og diplómanámi í kennslufræðum frá Háskólanum í Reykjavík fimm árum síðar. Eftir útskrift árið 2006 hóf hún störf á Landspítalanum og starfaði þar fram að doktorsnáminu sem hófst við Lyfjafræðideild árið 2012. Samhliða doktorsnáminu hefur Anna Bryndís sinnt kennslu við sömu deild.