Skiptinámsferlið - Skref fyrir skref

• Athugaðu hvort þú uppfyllir skilyrði til að fara í skiptinám, þá aðallega að þú munir ljúka 60 ECTS í faginu þínu áður en skiptinámsdvöl hefst.
• Byrjaðu undirbúning snemma, sérstaklega ef þörf er á tungumálaprófi. Hægt er að sjá hvaða skólar fara fram á tungumálapróf í skólasamningagrunninum í flestum tilfellum. Langflestir skólar í Bandaríkjunum, Kanada, Ástralíu og Nýja Sjálandi gera kröfu um tungumálapróf. Eina viðurkennda prófið sem þreytt er á Íslandi er TOEFL. Nokkrir skólar hafa opnað á Duolingo enskuprófið en mikilvægt er að skoða inntökukröfur á vefsíðu gestaskólans vel til að kanna það.
• Komdu á einn af kynningarfundunum um skiptinám sem haldnir eru reglulega. Einnig er hægt að fá upplýsingar um skiptinám með því að koma á Alþjóðasvið, 1. hæð í aðalbyggingunni, á opnunartíma.
• Taktu þátt í að aðstoða erlenda nemendur í mentorverkefni Alþjóðasviðs og Stúdentaráðs.
• Skoðaðu listann yfir samstarfsskóla Háskóla Íslands. Mikilvægt er að velja skóla þar sem samstarf er í þínu fagi og á þínu námsstigi. Veldu einn eða fleiri skóla til vara.
• Skoðaðu vel vefsíður skólanna sem þú hefur áhuga á. Mikilvægt er að nemendur kynni sér vel umsóknarskilyrði gestaskóla.

• Undirbúðu þig vel áður en þú fyllir út umsókn um skiptinám og skoðaðu þá sérstaklega námskeiðin í boði. Athugaðu að í fæstum tilfellum er kennsluskrá viðkomandi skóla fyrir næsta skólaár tilbúin svo miðaðu við núverandi kennsluskrá. Talaðu við deildina þína ef þú ert með spurningar um námskeiðaval.
• Sæktu svo um rafrænt á heimasíðu HÍ fyrir umsóknarfrest og hengdu eftirfarandi við umsóknina:
  • Námsferilsyfirlit á ensku með árangursröðun (aðgengilegt í "Uglan mín" - "Vottorð og námsferilsyfirlit").
  • TOEFL-niðurstöður (ef við á).

• Eftir að umsókn og fylgigögn hafa verið send inn þarf deild nemandans að staðfesta að hann uppfylli skilyrði fyrir skiptinám. Að því loknu vinnur Alþjóðasvið úr umsóknum og raðar nemendum niður í gestaskóla.
• Umsækjendur fá tölvupóst um afgreiðslu umsóknar og næstu skref innan 6-8 vikna frá umsóknarfresti. Hafðu hugfast að ekki er víst að þú verðir tilnefnd/ur í þann skóla sem þú settir sem fyrsta val heldur skóla sem þú tilgreindir sem annað eða þriðja val.
• Athugaðu að umsóknarferlið er tvíþætt. Fyrst sækja nemendur um að fara í skiptinám til HÍ sem tilnefnir svo nemendur í gestaskóla. Að lokum sækja nemendur sjálfir um í gestaskóla eftir leiðbeiningum sem skólinn eða HÍ sendir.
• Mikilvægt er að fylgjast vel með umsóknarfresti hjá gestaskóla og passa að senda inn umsókn og fylgigögn fyrir frest.
• Eftir að þú hefur fengið tilkynningu frá Alþjóðasviði um að þú verðir tilnefnd/ur í skiptinám skaltu vera viðbúin/n að útvega fljótt þau gögn sem kann að vera kallað eftir hér eða hjá gestaskóla, þar með talið námssamning.
• Hafðu samband við deildina þína tímanlega til að fara yfir fyrirhugaðan námssamning og fáðu undirritun.
• Allir nemendur þurfa að skila námssamningi fyrir brottför. Í námssamningi eru skráð þau námskeið sem nemandinn tekur við gestaskólann, hvernig þau verða metin og í staðinn fyrir hvaða námskeið þau koma. Nemendur sem fara í skiptinám til skóla innan Evrópu þurfa að athuga hvenær frestur gestaskólans til að skila inn námssamningi rennur út og skila honum fyrir þann tíma. Nemendur þurfa að hafa skilað inn fullundirrituðum námssamningi til Alþjóðasviðs í allra síðasta lagi mánuði fyrir upphaf dvalar.

Frekari upplýsingar um námssamninginn

• Mikilvægt er að nemendur sem hyggja á skiptinám sinni árlegri skráningu og greiði skráningargjald við HÍ. Ekki er hægt að vera skiptinemi á vegum HÍ án þess að vera skráður nemandi við skólann. Nemendur skulu fara í árlegu skráninguna í Uglu og velja a.m.k. eitt námskeið í HÍ á því misseri sem nemendur stefna á skiptinámið. Nemendur geta skráð sig úr því síðar. Í skráningunni geta nemendur svo farið inn á greiðslugátt til þess að greiða skráningargjaldið en greiðslugáttin er líka opin til 4. júlí í Uglu.

Það getur verið örlítið mismunandi ferli áður en farið er í skiptinámið, eftir því hvort nemendur eru að fara í gegnum Erasmus+, Nordplus eða til landa utan Evrópu.

Þurfi nemendur að gera breytingar á námskeiðum á meðan á dvöl stendur er mikilvægt að fylla út nýjan námssamning eða fylla út breytingaskjal fyrir námssamninginn og fá undirskrift frá viðeigandi aðilum úti í deildum og sviðum. Mikilvægt er að ganga úr skugga um að deild heimili allar breytingar svo námskeiðin verði metin inn í feril nemenda í HÍ.

Ákveði nemandi á einhverjum tímapunkti að hætta við skiptinámið þá er mikilvægt að láta Alþjóðasvið vita um það strax. Ef nemendur hafa fengið styrk þá gætu þeir þurft að greiða hann til baka að fullu.

Að loknu skiptinámi bjóðast nemendum margskonar tækifæri til að nýta reynslu sína og halda áfram að vera alþjóðlegir.

• Mentorar
  Það er upplagt að taka þátt í Mentorverkefni Alþjóðasviðs og SHÍ sem tengiliður (mentor) fyrir erlenda nemendur. Þetta er frábært tækifæri til að viðhalda erlendum tengslum og bæta tungumálakunnáttu. Mentorar fá viðurkenningu fyrir störf sín skráða í svokallaðan skírteinisviðauka (Diploma Supplement) sem inniheldur viðbótarupplýsingar við prófskírteini. Slík viðurkenning getur komið að góðum notum þegar sótt er um störf eða skólavist erlendis.
• Ambassadorar
  Nemendur geta einnig aðstoðað Alþjóðasvið við að kynna skiptinám og námsdvöl erlendis með því að taka þátt í s.k. ambassadoraprógrammi sviðsins.
  Hlutverk ambassadora er m.a. að:
  • miðla af reynslu sinni af skiptinámi
  • aðstoða við kynningar á skiptinámi - m.a. í Alþjóðavikunni og á Háskóladeginum
  • taka þátt í undirbúningsfundum fyrir þá sem eru að fara í skiptinám

Áhugasamir geta skráð sig til leiks á sérstöku skráningarformi. Skráningin auðveldar okkur að hafa samband við fyrrum skiptinema sem hafa áhuga á að taka þátt í að kynna skiptinámið með okkur.
 

• ESN Iceland
  Nemendur geta tekið þátt í starfi evrópsku stúdentasamtakanna Erasmus Student Network, sem eru með útibú á Íslandi. Markmið samtakanna er að aðstoða erlenda nemendur á Íslandi við að aðlagast samfélaginu og kynnast öðrum nemendum. ESN Iceland stendur fyrir öflugu félagslífi fyrir erlenda nemendur sem öllum nemendum er frjálst að taka þátt í.
• Aftur út í nám eða þjálfun
  Nemendur geta skoðað möguleika á að fara aftur út í skiptinám, sumarnám eða starfsþjálfun. Erasmus+ styrkir eru veittir í 12 mánuði samtals að hámarki á hverju námsstigi en það þýðir að nemendur geta t.d. farið í Erasmus+ skiptinám í níu mánuði og síðan í starfsþjálfun í þrjá mánuði. Einnig er hægt að fara í frekara nám erlendis á eigin vegum, sjá http://farabara.is/
   
• Skiptinám og atvinnutækifæri
  Rannsóknir sýna að atvinnurekendur leita í auknum mæli eftir starfskröftum með alþjóðlega reynslu. Því getur skipt máli að setja upplýsingar um skiptinámsdvölina í ferilskrána. Náms- og starfsráðgjöf HÍ getur aðstoðað við atvinnuleit að loknu námi og gerð ferilskráa.