Prófessorar við Háskóla Íslands í hópi áhrifamestu vísindamanna heims
![Prófessorar við Háskóla Íslands í hópi áhrifamestu vísindamanna heims - á vefsíðu Háskóla Íslands](https://www.hi.is/sites/default/files/styles/efsta_mynd___fr_ttum/public/bgisla/_kri8249xx1_37.jpg?itok=PFhpOnx3)
Átta vísindamenn sem ýmist eru prófessorar við Háskóla Íslands eða starfa í nánum tengslum við skólann eru í hópi 4.000 áhrifamestu vísindamanna heims. Þetta er niðurstaða nýs lista á vegum hins virta greiningarfyrirtækis Clarivate Analytics sem birtur var í gær. Íslensku vísindamönnunum í þessum hópi fjölgar um tvo á milli ára en alls hefur vísindamönnum með tengsl við íslenskar rannsóknastofnanir og -fyrirtæki á listanum fjölgað um fjóra frá árinu 2017.
Þetta er í fimmta sinn sem Clarivate Analytics birtir lista yfir áhrifamestu vísindamenn heims. Hann nær til þess eins prósents vísindamanna innan hverrar fræðigreinar sem mest er vitnað til í vísindagreinum sem birtast í alþjóðlegum vísindatímaritum. Listinn byggist á gögnum úr gagnabankanum Web of Science. Horft er til tilvitnana á tilteknu árabili við matið. Listinn í ár nær til rúmlega 4.000 vísindamanna á 21 fræðasviði en þess má geta að í hópnum eru 17 Nóbelsverðlaunahafar.
Það er til marks um vaxandi styrk íslensks vísindasamfélags að hópur íslenskra vísindamanna og erlendra starfsbræðra þeirra sem hafa tengsl við íslenskar rannsóknarstofnanir og -fyrirtæki og eru á listanum fer stækkandi. Vísindamennirnir eru 13 í ár en voru 9 í fyrra.
Þessir vísindamenn eru:
Vísindamaður | Stofnun/fYRIRTÆKI | STAÐA VIÐ HÁSKÓLA ÍSLANDS |
---|---|---|
Albert Vernon Smith | University of Michigan/HÍ | rannsóknaprófessor |
Augustine Kong | DeCode Genetics | |
Bernharð Örn Pálsson | UCSD/HÍ | gestaprófessor |
Daníel F. Guðbjartsson | DeCode Genetics | |
Guðmar Þorleifsson | DeCode Genetics | |
Hreinn Stefánsson | Decode Genetics | |
Jón Atli Benediktsson | Háskóli Íslands | prófessor |
Kári Stefánsson | DeCode Genetics/HÍ | prófessor |
Thor Aspelund | Háskóli Íslands | prófessor |
Unnur Þorsteinsdóttir | DeCode Genetics/HÍ | rannsóknaprófessor |
Valgerður Steinþórsdóttir | DeCode Genetics | |
Vilmundur Guðnason | Hjartavernd/HÍ | prófessor |
Þorsteinn Loftsson | Háskóli Íslands | prófessor |
Jón Atli Benediktsson, rektor Háskóla Íslands og prófessor í rafmagns- og tölvuverkfræði, kemur nýr inn á listann í ár fyrir hönd Háskólans og það gerir líka Thor Aspelund, prófessor í tölfræði við Miðstöð lýðheilsuvísinda. Þá er Vilmundur Guðnason, forstöðulæknir Hjartaverndar og prófessor við Læknadeild Háskóla Íslands, í hópi áhrifamestu vísindamannanna sem mest er vitnað til á tveimur fræðasviðum, þ.e. í klínískri læknisfræði annars vegar og sameindalíffræði og erfðafræði hins vegar, en slíkt er afar fátítt.