Doktorsvörn í íslenskri málfræði: Roberto Luigi Pagani

Föstudaginn 11. september fer fram doktorsvörn við Íslensku- og menningardeild Háskóla Íslands. Þá ver Roberto Luigi Pagani doktorsritgerð sína í íslenskri málfræði, Scribes and Scribal Practice in Fifteenth-Century Iceland, A Study on the Evolution of Script and Language. Viðburðurinn fer fram í Hátíðasal í Aðalbyggingu Háskóla Íslands og hefst kl. 13:00.

Andmælendur við vörnina verða Lasse Mårtensson, prófessor við Uppsala Háskóla og Veturliði Óskarsson, prófessor við Uppsala Háskóla. Doktorsritgerðin var unnin undir leiðsögn Haraldar Bernharðssonar, prófessors í íslenskum miðaldafræðum við Háskóla Íslands. Einnig voru í doktornefnd Guðrún Þórhallsdóttir, dósent í íslensku við Háskóla Íslands, Guðvarður Már Gunnlaugsson, rannsóknarprófessor við Stofnun Árna Magnússonar og Haukur Þorgeirsson, rannsóknarprófessor við sömu stofnun.

Ásgrímur Angantýsson, forseti Íslensku- og menningardeildar, stjórnar athöfninni.

Um rannsóknina

Markmið þessarar rannsóknar er að lýsa þróun íslenskrar skriftar og stafsetningar á hinni „löngu“ fimmtándu öld (um 1375–1525) með megindlegri greiningu á fimmtíu skrifarahöndum. Skoðuð eru þrjú skriftarfræðileg og sjö málfræðileg atriði til að meta hvort tímabilið hafi raunverulega einkennst af stöðnun. Niðurstöðurnar sýna að breytingar voru stigbundnar og misjafnar, þar sem eldri og yngri myndir lifðu oft hlið við hlið. Engir skýrir skrifaraskólar eða svæðisbundin mynstur komu í ljós, heldur sterk einstaklingsbundin skrifaravenja. Rannsóknin endurmetur því fimmtándu öld sem umbreytingaskeið og leggur nýjan grunn að nákvæmari tímasetningu handrita og skilningi á þróun íslenskrar ritmenningar.

Um doktorsefnið  

Roberto Luigi Pagani lauk BA-prófi í skandinavískum fræðum við Háskólann í Mílanó og MA-prófi í íslenskum miðaldafræðum við Háskóla Íslands. Hann starfar nú sem aðjunkt í íslensku sem öðru máli við Háskóla Íslands.