Fræðileg aðferð (HJÚ140F)

Markmið námskeiðsins er að nemendur nái tökum á fræðilegum vinnubrögðum á þann hátt að þeir geti hagnýtt fyrirliggjandi fræðilega þekkingu í hjúkrun. Athyglin beinist að aðferðum við öflun heimilda í gagnasöfnum og mati á þeim. Fjallað er um gagnreynda starfshætti, s.s. notkun klínískra leiðbeininga og verklagsreglna. Áhersla er lögð á að þjálfa aðferðir við leitir og mat á fræðilegu efni ásamt textavinnslu.

Námskeiðið er haldið í upphafi kennslumisseris.

Hjúkrun nýrnasjúklinga I (HJÚ0BLF)

Námskeiðið veitir yfirsýn og dýpri skilning á bráðum og langvinnum nýrnasjúkdómum, faraldsfræði, áhættuþáttum, fylgikvillum og meðferð, ásamt færni í líkamsmati á einkennum tengdum vanstarfsemi í nýrum. Fjallað verður um fyrirbyggingu og seinkun framgangs nýrnasjúkdóma ásamt sértækri lyfjafræði þar sem áhersla er á lyf sem hafa áhrif á starfsemi nýrna, auk greiningar á vökva- og elektrólýta jafnvægi tengd minnkraðri starfsgetu nýrna, eftirlit og meðferðir tengdar skilunarmeðferð. Jafnframt verður fjallað um sértæk næringarvandamál nýrnasjúklinga.

Námskeiðið leggur grunn að klínískri, fræðilegri og ígrundandi færni sem nýtist við sérhæfða hjúkrun sjúklinga með nýrnasjúkdóma og við þróun hjúkrunar á þessu sviði.

Kennsla byggist á blandaðri nálgun og notast við fyrirlestra, umræður, ígrundun og verkefni.

Lyfjafræði fyrir hjúkrunarfræðinga (HJÚ159F)

Markmið námskeiðsins er að hjúkrunarfræðingar þekki og skilji virkni lyfja sem geri þeim kleift að meðhöndla lyf og flóknar lyfjagjafir til sjúklinga innan og utan sjúkrahúsa á öruggan og ábyrgan hátt.

Í námskeiðinu er með fyrirlestrum og  umræðutímum kynnt virkni, lyfhrif, lyfjahvörf, ábendingar og frábendingar hjarta- og æða-lyfja, sýklalyfja, meltingarfæralyfja, innkirtlalyfja, hormónalyfja, taugalyfja, verkjalyfja og öndunarfæralyfja auk lyfjaforma. Áhersla er á að leysa flókin klínísk dæmi í hjúkrun sjúklinga innan og utan sjúkrahúsa þar sem þekking á virkni, auka-, milli-, og sam-verkunum lyfja og lyfjaforma er þjálfuð.

Námskeiðið er ætlað hjúkrunarfræðingum í framhaldsnámi í Hjúkrunar- og ljósmóðurfræðideild.

Kennarar eru lyfjafræðingar, sérfræðilæknar og sérfræðingar í hjúkrun.

Líknarmeðferð (HJÚ263F)

Viðfangsefni námskeiðsins er líknarmeðferð þar sem megin áhersla er á lífsgæði sjúklinga með lífsógnandi sjúkdóma og fjölskyldna þeirra, meðferð og umönnun við lífslok sem stuðlar að jákvæðri upplifun af lífslokum.  

Umfjöllun verður um líknarmeðferð bæði sem hugmyndafræði og meðferð. Fjallað verður um líknarmeðferð fyrir mismunandi sjúklingahópa og  lögð verður áhersla á mat og meðferð helstu einkenna,  sálfélagslegan stuðning við sjúkling og fjölskyldu, tjáskipti og samskipti, siðfræðileg álitamál, sorg og sorgarúrvinnslu. 

Áhersla verður lögð á grundvallarþætti líknarmeðferðar og útfærslu þeirra í klínísku starfi og farið verður yfir nýjustu stefnumótun varðandi útfærslu á líknameðferð innan heilbrigðiskerfis. Nemendur verða hvattir til að spegla nýja þekkingu við klínískt starf og miðað er við að námskeiðið nýtist vel í klínísku starfi.

Klínísk lífeðlis- og meinafræði (HJÚ0AQF)

Tilgangur námskeiðsins er að dýpka þekkingu hjúkrunarfræðinga á lífeðlisfræðilegum ferlum og meinafræðilegum breytingum í starfsemi mannslíkamans sem orsaka sjúkdóma. Fjallað verður um algenga sjúkdóma á mismunandi æviskeiðum lífsins með áherslu á orsakir, undirliggjandi meinalífeðlisfræðilegar breytingar, klínísk einkenni, sjúkdómsferli, greiningu, og meðferð. Jafnframt verður fjallað um eðlilegar breytingar á lífeðlisfræðilegum ferlum öldrunar og áhrif þeirra á starfsemi líffæra og líffærakerfa á efri árum. Í námskeiðinu verður notast við fjölþættar kennsluaðferðir þar sem áhersla er lögð á virka þáttöku nemenda og yfirfærslu þekkingar yfir á klínískar aðstæður.  

Hjúkrun nýrnasjúklinga II (HJÚ0BMF)

Námskeiðið veitir yfirsýn og dýpri skilning á hjúkrun sjúklinga með nýrnasjúkdóma.

Áhersla er lögð á sérhæft hlutverk hjúkrunarfræðinga í greiningu og meðferð sjúklinga, þ.m.t. einkennameðferð (m.a. þreyta, kvíði, blóðþurrð og eituráhrif úrea uppsöfnunar, meðferð á efnaskiptasýringu og fituefnaröskun), sjálfsumönnun, lífsgæði, fræðslu, skjólstæðingsmiðaða hjúkrun  og stuðningi og samvinnu við sjúklinga og aðstandendur. Teymisvinna og hjúkrun utan bráðafasa verður útfærð sérstaklega. Rýnt er í klínískar leiðbeiningar, nýjustu rannsóknir og gagnreynda nálgun í hjúkrun nýrnasjúklinga, auk þess sem fjallað er um einkenni langvinnra sjúkdóma, ásamt siðferðilegum álitaefni sem tengjast greiningu, meðferð og ákvarðanatöku.

Námskeiðið leggur grunn að klínískri, fræðilegri og ígrundandi færni sem nýtist við sérhæfða hjúkrun sjúklinga með nýrnasjúkdóma og við þróun hjúkrunar á þessu sviði.

Kennsla byggist á blandaðri nálgun þar sem nýjustu rannsóknir og klínískar leiðbeiningar eru tengdar dæmum úr klínísku starfi. Notast er við fyrirlestra, umræður, ígrundun og verkefni.

Fræðileg aðferð (HJÚ140F)

Markmið námskeiðsins er að nemendur nái tökum á fræðilegum vinnubrögðum á þann hátt að þeir geti hagnýtt fyrirliggjandi fræðilega þekkingu í hjúkrun. Athyglin beinist að aðferðum við öflun heimilda í gagnasöfnum og mati á þeim. Fjallað er um gagnreynda starfshætti, s.s. notkun klínískra leiðbeininga og verklagsreglna. Áhersla er lögð á að þjálfa aðferðir við leitir og mat á fræðilegu efni ásamt textavinnslu.

Námskeiðið er haldið í upphafi kennslumisseris.

Rekstur og heilbrigðisþjónusta (HJÚ142F)

Markmið námskeiðsins er að veita nemendum innsýn í fræðilega nálgun ýmissa hagrænna þátta sem hafa áhrif á starfsumhverfi í heilbrigðisþjónustu. Þessir þættir eru óumflýjanlegir í öllum rekstri stórum og smáum, hvort sem er opinber rekstur eða einkarekstur.  Í námskeiðinu er farið yfir með hvaða hætti þættirnir birtast og hvernig hægt er að hafa áhrif á þá rekstrinum til góða.  Meðal hugtaka sem farið verður yfir:

• Framboð, eftirspurn, framleiðsluþættir, teygni
• Breytilegur-, fastur-, beinn- og óbeinn kostnaður.
• Áhrif skattheimtu og utanaðkomandi áhrif. Einkagæði og sameiginleg gæði.
• Viðskipti og hlutfallslegir yfirburðir. Hringrás efnahagslífsins.
• Framfærslukostnaður, vísitölur og þjóðhagsreikningar.
• Fjárhagsbókhald, rekstrar- og efnahagsreikningur.
• Rekstrarbókhald, mismunandi rekstrargreiningar.

Stjórnun í heilbrigðisþjónustu (HJÚ259F)

Markmið námskeiðsins er að nemandi öðlist fræðilega og hagnýta þekkingu á viðfangsefnum stjórnunar og búa þá undir hlutverk stjórnenda í heilbrigðisþjónustu. Áhersla er lögð á hlutverk stjórnenda, mannauðsstjórnun, teymisvinnu, vinnuumhverfi, þjónustu við sjúklinga, gæði og öryggi. Leitast er við að taka fyrir hagnýt viðfangsefni heilbrigðisþjónustunnar á Íslandi og í alþjóðlegu samhengi í nútíð og framtíð og þannig efla fræðilega og hagnýta hæfni nemandans.

Námskeiðið er kennt í samstarfi við University of Minnesota og er COIL námskeið (Collaborative Online International Learning) sem felur í sér sameiginlegt kennsluefni og verkefni með kennurum og nemendum í DNP námi í forystu í hjúkrun. Aðalsamstarfskennari við University of Minnesota er dr. Stephanie Gingerich, lektor við University of Minnesota.

Forysta í heilbrigðisþjónustu (HJÚ258F)

Markmið námskeiðsins er að nemendur öðlist fræðilega og hagnýta þekkingu á viðfangsefnum forystu og búa þá undir hlutverk leiðtoga í heilbrigðisþjónustu. Áhersla er lögð á hlutverk leiðtoga í klíník, stjórnun og kennslu. Námskeiðinu er ætlað að búa nemendur undir forystuhlutverk í starfi. Farið er í lykilþætti forystu í heilbrigðisþjónustu staðbundið og í alþjóðlegu samhengi. Fjallað verður um ýmis hugtök, kenningar og hugmyndafræði forystu almennt. Enn fremur verður fjallað um hlutverk og hegðun leiðtoga og hlutverk leiðtoga í breytingaferlinu. Áhersla er á forystuhlutverk heilbrigðisstarfsmanna innan heilbrigðisstofnana og í samfélaginu, staðbundið og í alþjóðlegu samhengi, nú og til framtíðar. Lögð er áhersla á hnattræna framtíðarsýn og frumkvæði.

Fyrirkomulag
Staðlotur og vefkennsla.

Mannauðsstjórnun ríkis og sveitarfélaga (OSS102F)

Fjallað er um mannauðsstjórnun hjá hinu opinbera. Farið er yfir lög og reglur sem gilda um réttarsamband opinberra starfsmanna við vinnuveitendur, samskipti á vinnumarkaði og uppbyggingu launakerfis opinberra starfsmanna. Rætt er um helstu tæki og tól við mannauðsstjórnun svo sem mannauðskerfi, aðferðir við val á starfsmönnum, notkun starfs- og árangursmats, starfsmannasamtöl og mótun og eftirfylgni með starfsmannastefnum. Fjallað verður um sálfræðilega samninginn, ýmis vandamál sem upp geta komið á vinnustað og vinnuvernd og öryggismál.

Siðferðileg álitamál samtímans (HSP723M)

Áleitin siðferðileg úrlausnarefni ofarlega á baugi í nútímasamfélagi eru meginviðfangsefni þessa námskeiðs. Sjónum er beint að möguleikum siðfræðinnar á að takast á við klemmur sem upp koma, jafnt í lífi einstaklinga sem á samfélagsgrundvelli. Val á viðfangsefnum getur breyst milli ára en meðal mögulegra viðfangsefna námskeiðsins má nefna tjáningarfrelsi, stöðu flóttafólks, réttindi dýra, fátækt og ójöfnuð, kynjamisrétti, kynþáttamisrétti, umhverfismál og ýmis álitamál úr heilbrigðiskerfinu. Farið er í tengsl fræðilegrar og hagnýttrar siðfræði. Námskeiðið byggir á fyrirlestrum með ríkri áherslu á virka þátttöku nemenda í umræðum.

Breytingastjórnun (VIÐ190F)

Í þessu námskeiði verður farið yfir helstu atriði breytingastjórnunar, s.s. innleiðingu breytinga, viðbrögð starfsmanna, helstu hindranir í vegi breytinga ásamt þeim hamlandi og hvetjandi kröftum sem eru að verki í breytingaferlinu.  Farið verður ítarlega í kenningar og aðferðir sem breytingastjórnun byggir á og ræddar verða algengustu lausnir og aðferðir í stjórnun breytinga.  Rætt verður um hlutverk leiðtoga, stjórnenda almennt og millistjórnenda í breytingum sem og krísustjórnun. Fjallað verður einnig um fyrirtækjamenningu og hvers vegna hún er mikilvægur þáttur í breytingaferlinu.

Nám fullorðinna og þróun mannauðs (NAF003F)

Símenntun, endurmenntun, mannauðsþróun eru hugtök sem æ fleiri þurfa að takast á við vegna vinnu sinnar. Stjórnendur þurfa til dæmis að útbúa símenntunaráætlanir, sérfræðingar þurfa að kenna samstarfsfólki sínu, kennarar koma að foreldrastarfi eða starfsþróun samkennara sinna og svo mætti lengi telja.  Þetta námskeið er fyrir fólk sem vill dýpka skilning sinn á námi fullorðinna, til að geta betur tekið ákvarðanir um símenntun, skipulagt fræðslustarf eða unnið á annan hátt með fullorðnum sem ætla að læra. Námskeiðið gefur fræðilegan grunn undir allt fræðslustaf með fullorðnum.

Markmið
Markmið námskeiðsins er að þátttakendur öðlist haldgóða þekkingu á rannsóknum og kenningum um nám fullorðinna, og geti nýtt þá þekkingu til að taka rökstuddar ákvarðanir í tengslum við skipulagningu náms fyrir fullorðna og / eða við það hjálpa fullorðnum á annan hátt til að læra, takast á við breytingaferli og þroskast.

Inntak / viðfangsefni
Til að ná þessum yfirmarkmiðum takast nemendur við þrjú aðal viðfangsefni á námskeiðinu:

1. Greiningu á hlutverki náms og menntunar fullorðinna í ljósi þróunar samfélagsins, rannsókn á því hvernig stofnanir samfélagsins hafa brugðist við - einkum hvað varðar aðgerðir sem ætlað er að styðja við nám fullorðinna. Þátttakendur læra að nota ýmis verkfæri til þess að greina samtímann og meta mögulegar þarfir fullorðinna fyrir nám.
2. Rannsókn á sérkennum og sérstöðu fullorðinna námsmanna. Könnun á kenningum um hið sama og greining á gagni þeirra til að skýra og skipuleggja nám fyrir fullorðna og með þeim.
3. Þátttakendur kynna sér nokkur meginstef úr kennslufræði fullorðinna. Hugmyndir um fullorðna námsmenn, þátttöku þeirra í fræðslu, áhugahvöt og hindranir, hlutverk leiðbeinenda í fullorðinsfræðslu, mótun námsumhverfis, samskipti kennara og nemenda og fleira.

Vinnulag

Námskeiðið verður kennt á formi sem er kallað "Valvíst nám". En það þýðir að þátttakendur geta valið hvort þeir mæta í skólann, taka þátt í gegnum fjarfundabúnað í rauntíma eða hlusta á upptökur og taka virkan þátt í samvinnu þátttakenda á netinu milli reglulegra funda.

Á námskeiðinu eru tvær "vinnulotur" þar sem allir þátttakendur vinna saman í heilan dag í tengslum við efni namskeiðsins. Þátttakendur eru hvattir til að mæta í húsnæði Menntavísindaseviðs við Stakkahlíð í vinnuloturnar. Þar verða teknar mikilvægar ákvarðanir um námskeiðið, þátttakendur kynnast vel og það styður við samvinnu þeirra á námskeiðinu, þá reynum við að beita aðferðum sem nýtast vel í fullorðinsfræðslu, þannig að þátttakendur upplifa ýmsar aðferðir sem þeir geta síðan nýtt við skipulagningu náms og kennslu.

Síðan hittast þeir vikulega í húsnæði skólans eða á netinu.

Á milli funda og vinnulota fer samvinnan fram á vef námskeiðsins, t.d. í gegnum skriflegar umræður á umræðuþráðum námskeiðsins.

Fyrir hverja er þetta námskeið?

Námskeiðið hentar öllum þeim sem koma – eða vilja koma – á einhvern hátt að ákvörðunum um nám fullorðinna, skipulagningu þess og útfærslu. Það hentar þannig fólki sem starfar við mannauðs- og fræðslumál innan fyrirtækja og stofnana, stjórnendur og verkefnastjóra í stofnunum sem bjóða upp á nám og námskeið fyrir fullorðna sem og sérfræðingum sem hafa áhuga á að kenna fullorðnum. Námskeiðið býður þessu fólki tækifæri að afla sér góðrar grunnþekkingar á helstu spurningum og viðfangsefnum sem snerta nám fullorðinna, forsendur, aðstæður og skipulagningu þess. Námskeiðið gefur þannig góða undirstöðu fyrir alls konar verkefni er varða nám fullorðinna almennt.

Fjölbreytileiki og inngilding (inclusion) í skipulagsheildum (VIÐ288F)

Námskeiðið veitir nemendum tækifæri til að bera kennsl á þörfina á að þróa vinnuumhverfi sem byggir á jafnréttishugsun og inngildingu ólíkra hópa þar sem fjölbreytt framlag er velkomið. Nemendur læra að bera kennsl á félagslegt réttlæti/útilokun minnihlutahópa t.d. vegna kynþáttar, uppruna, aldurs, kyns, trúarbragða, kynhneigðar, fötlunar/færni, stéttar og annara fjölbreytileikaþátta í skipulagsheildum og nýta þekkinguna til að greina og beita aðferðum stjórnunar fjölbreytileika og  inngildingar í skipulagsheildum. Nemendur kynnast nýjum rannsóknum á sviðinu til að efla gagnrýna hugsun um viðfangsefni eins og sjálfsmynd (identity), (ó)meðvitaða hlutdrægni, samvinnu í fjölbreyttum teymum, (ó)jöfn tækifæri í skipulagsheildum og tækifærum sem felast í fjölbreytileikanum. 

Námskeiðið er kennt á ensku

Stjórnsýsluréttur fyrir stjórnendur og starfsmenn opinberra stofnana (OSS204F)

Fjallað verður um íslensk stjórnvöld, íslenska stjórnsýslukerfið, reglur sem gilda um samskipti og yfirstjórn innan stjórnsýslukerfisins, um meðferð stjórnsýslumála og upplýsingarétt almennings. Aðalháerslan er á meðferð stjórnsýslumála og þýðingu stjórnsýslulaga nr. 37/1993 í því sambandi. 

Fræðileg aðferð (HJÚ140F)

Markmið námskeiðsins er að nemendur nái tökum á fræðilegum vinnubrögðum á þann hátt að þeir geti hagnýtt fyrirliggjandi fræðilega þekkingu í hjúkrun. Athyglin beinist að aðferðum við öflun heimilda í gagnasöfnum og mati á þeim. Fjallað er um gagnreynda starfshætti, s.s. notkun klínískra leiðbeininga og verklagsreglna. Áhersla er lögð á að þjálfa aðferðir við leitir og mat á fræðilegu efni ásamt textavinnslu.

Námskeiðið er haldið í upphafi kennslumisseris.

Faraldsfræði, útbreiðsla smitsjúkdóma og sóttvarnir (HJÚ162F)

Tilgangur námskeiðsins er að kynna hjúkrunarfræðingum fyrir faraldsfræði smitsjúkdóma og aðferðum til að meta og stemma stigu við útbreiðslu þeirra; þeim lögum og reglugerðum sem ná yfir opinberar sóttvarnarráðstafanir; og starfsemi ónæmiskerfisins í tengslum við sýkingar og virkni bóluefna.

Í námskeiðinu verður fjallað um smitsjúkdómafaraldsfræði, sögu fræðigreinarinnar og helstu hugtakaskilgreiningar. Nemendur fá kynningu á nálgun orsaka, faraldsfræðilegum rannsóknaraðferðum og þeim mæliaðferðum sem notaðar eru til að skilgreina og meta útbreiðslu smitsjúkdóma. Rætt verður um notkun tölfræði í faraldsfræði, kerfisbundna skekkjuvalda í rannsóknum og aðferðir til að koma í veg fyrir þá. Fjallað verður um tegundir faraldra, viðbrögð við hópsýkingum og vöktun á tíðni smitsjúkdóma. Þá fá nemendur einnig kynningu á sóttvarnarlögum og reglugerð um sóttvarnarráðstafanir; hlutverki opinberra stofnana eins og embætti Sóttvarnarlæknis; og samstarfi við Almannavarnir og heilbrigðisstofnanir þegar tekist er á við heilbrigðisvá. Einnig er fjallað um siðferðisleg álitamál tengt lögbundnum aðgerðum til að stemma stigu við útbreiðslu smitsjúkdóma. Að lokum fá nemendur kennslu um ræsingu ósértæka og sértæka ónæmiskerfisins í tengslum við algenga smitsjúkdóma og virkni bóluefna.

Gert er ráð fyrir því að kennsla geti farið fram bæði í fjar- og staðarnámi eftir aðstæðum nemenda, og/eða stöðu heimsfaraldurs Covid-19.

Sýkingavarnir og smitsjúkdómahjúkrun (HJÚ344F)

Tilgangur námskeiðsins er að auka þekkingu nemenda á undirstöðuatriðum sýkingavarna, helstu smitsjúkdómum og hjúkrunarfræðilegri meðferð.

Námskeiðið mun dýpka þekkingu nemenda og auka hæfni til að draga úr dreifingu örvera innan heilbrigðisstofnanna. Farið verður í alla þætti grundvallar- og viðbótarsmitgátar og kennd aseptísk vinnubrögð. Í námskeiðinu er lögð áhersla á að kynna nemendur fyrir ónæmum bakteríum, aðferðum til að hefta útbreiðslu þeirra innan og utan stofnanna og hlutverki hjúkrunarfræðinga í sýklalyfjagæslu. Farið verður í helstu smitsjúkdóma og sýkingar og viðfangsefni hjúkrunarfræðinga tengt því. Þar sem aukning er á ferðalögum milli heimsálfa og fjölgun á hópi einstaklinga með annan menningarbakgrunn verður sérstaklega tekið fyrir hjúkrun í tengslum við menningarhæfni.

Gert er ráð fyrir því að kennsla geti farið fram bæði í fjar- og staðarnámi eftir aðstæðum nemenda. Notast verður við fjölbreyttar aðferðir við kennslu. Stærstur hluti kennslu verður í formi fyrirlestra, en áhersla verður lögð á að tengja fræðilegan hluta við raunveruleg dæmi, m.a. með kynningum frá sérfræðingum á sviði sýkingavarna og smitsjúkdóma. Gert er ráð fyrir virka þátttöku nemenda í kennslustundum, færnisetri, umræðufundum og verkefnum sem tengjast efnisatriðum námskeiðsins. Lögð verður áhersla á gagnrýni á vinnubrögð í nærumhverfinu og ígrundanir tengt starfi.

Sýkla-, veiru- og örverufræði (LYF307M)

Í námskeiðinu er fjallað um orsakir smitsjúkdóma. Farið verður yfir uppbyggingu, eðli, sérkenni og mismun baktería, veira, sveppa og sníkjudýra, ásamt verklegri þjálfun á rannsóknarstofu í örverufræði. Farið verður í einkenni helstu smitsjúkdóma og varnir gegn þeim og meðferð. Farið verður yfir verkun helstu flokka sýklalyfja og þróun ónæmis gegn þeim.