Kvikmyndafræði

BA –

Í kvikmyndafræði er lögð áhersla á að skoða kvikmyndamiðilinn í sem víðustu samhengi og teknar eru til sýninga tilrauna- og heimildamyndir, ekki síður en leiknar frásagnarmyndir, og þær greindar í ljósi fjölbreyttra fræðikenninga.

Sækja um nám

Um hvað snýst námið?

Þetta nám er 120 eininga aðalgrein og því þarftu að taka 60 einingar í annnarri námsgrein með því til þess að útskrifast með BA próf.

Þetta nám er líka hægt að taka sem 60 eininga aukagrein með 120 eininga aðalgrein úr öðru fagi.

Við búum í stafrænum heimi sem er streymt til okkar í símana, tölvuleikir eru umfangsmesti menningariðnaður veraldar, og í vissum skilningi hafa kvikmyndir og tölvuleikir tekið að renna saman. Að hluta til vegna þess að sömu aðferðir eru notaðar til að skapa hvort tveggja, kvikmyndir og tölvuleiki. Framtíðin er stafræn og hún er myndræn. Nám í kvikmyndafræðinni undirbýr þig á fjölbreytilegan hátt fyrir framtíðina.

Helstu áhersluatriði

Kvikmyndarýni
Kvikmyndakenningar
Kvikmyndasaga
Kvikmyndir þjóðlanda
Kvikmyndagreinar
Kvikmyndahöfundar
Tengsl kvikmynda og bókmennta
Táknfræði í kvikmyndum

Helstu markmið

að veita yfirlit yfir sögu kvikmynda á Vesturlöndum og að nokkru leyti í öðrum heimshlutum,
að þjálfa nemendur í að skilja og túlka kvikmyndir frá ýmsum tímum og ólíkum þjóðlöndum, m.a. með hliðsjón af öðrum listgreinum, bókmenntum og menningu,
að kynna helstu hugtök og vinnuaðferðir í kvikmyndafræði og leiðbeina nemendum í gagnrýnni notkun á handbókum og öðrum ritum um kvikmyndir, bókmenntir og menningu almennt,
að þjálfa nemendur í að fjalla um kvikmyndir og annað myndefni og texta á sjálfstæðan hátt í fræðilegum ritgerðum

Kröfur og kennsluhættir

Gera þarf ráð fyrir mikilli heimavinnu. Í fyrsta lagi felst vinna nemenda í að greina og íhuga þær kvikmyndir sem eru skylduefni í viðkomandi námskeiðum, en jafnframt verða þeir að tileinka sér það lesefni sem vísað er til í kennslunni. Lesefni er fyrst og fremst á ensku og íslensku.

Tímasókn er mikilvæg en því aðeins hafa menn gagn af henni að þeir mæti vel undirbúnir og frumskilyrði er að hafa séð þær kvikmyndir og lesið þá texta sem fjalla á um hverju sinni.

Annar mikilvægur þáttur heimavinnunnar felst í vinnu verkefna og ritgerða. Til þess að kennslan megi verða lifandi samstarf getur verið nauðsynlegt að nemendur taki að sér að undirbúa og flytja í tímum verkefni af ýmsum gerðum.

Fyrirlestra- og umræðutímar eru einkum haldnir í Aðalbyggingu og Árnagarði, en kvikmyndasýningar fara allajafna fram í Háskólabíói.

Um kvikmyndafræði

Kvikmyndin hefur verið ríkjandi listmiðill um langt skeið og svo er enn við upphaf tuttugustu og fyrstu aldarinnar. En með tilkomu samskiptamiðla og stafrænnar tækni hefur myndmiðlun af ýmsu tagi tekið stakkaskiptum.

Ungt fólk er ekki aðeins neytendur heldur einnig framleiðendur myndefnis, og myndefnið sjálft hefur umbreyst í samskiptaform. Af þessum sökum hefur mikilvægi myndlesturs, kvikmyndarýni og ímyndatúlkunar aukist og endurspeglast það hvergi betur en í náminu í kvikmyndafræði við Háskóla Íslands.

Í kvikmyndafræði læra nemendur að horfa á kvikmyndir og skjámenningu og hugsa um þær með nýjum aðferðum og meðvituðum hætti. Í því felst að nemendur læra að tjá sig um kvikmyndir og myndefni með fræðilegu orðfæri og hugtakanotkun.

Nemendur eru þjálfaðir í að skilja og túlka kvikmyndir frá ýmsum tímum og ólíkum þjóðlöndum, m.a. með hliðsjón af öðrum listgreinum, bókmenntum og menningu.

Námskeið í kvikmyndafræði á borð við það sem reglulega er kennt um költmyndir og námskeiðið „Guð fyrirgefur en ekki ég“ um vestrahefðina fjalla bæði um kvikmyndagreinar, og kvikmyndagreinar eru jafnframt ein af námsáherslum greinarinnar.

Önnur áherslusvið í kvikmyndafræðináminu eru „kvikmyndir þjóðlanda“, námskeið um japanskar, þýskar, og ítalskar myndir eru kennd reglulega. Einnig má nefna „kvikmyndahöfunda“ (Varda, Pasolini, Lynch) og „fræðilegar nálgunarleiðir“ (femínismi, hinsegin fræði, höfundarkenningin, þjóðarbíó/heimsbíó).

Kvikmyndafræðin hefur haldið úti gagnrýnendasveit frá árinu 2017, Engum stjörnum, sem birt hefur á þriðja hundrað kvikmyndadóma. Frá 2019 hafa Engar stjörnur einnig haldið úti hlaðvarpi um kvikmyndir. Þetta er gert í samstarfi við öll kvikmyndahús Reykjavíkur og nemendur skrifa dómana sína í samvinnu við og fá ritstjórn frá kennurum í kvikmyndafræðinni.

Skrifin eru birt á Hugrás og þeim er deilt á samfélagsmiðlum.

Skipulag náms

Skiptinám

Háskóli Íslands er í samstarfi við yfir 400 háskóla um allan heim. Það veitir nemendum HÍ einstök tækifæri til að stunda hluta af náminu erlendis, öðlast alþjóðlega reynslu og styrkja stöðu sína á vinnumarkaði.

Möguleikar

Námsdvöl erlendis er alltaf háð samþykki deildar.

Skilyrði

Til að geta sótt um námsdvöl erlendis þarf námsleið við HÍ að vera að lágmarki:

90 ECTS einingar í grunnnámi
60 ECTS einingar í framhaldsnámi

Sjá frekari skilyrði

Námskeið metin til eininga

Nemendur geta fengið námskeið sem tekin eru erlendis metin sem hluta af námi við HÍ,
þannig að námsdvölin þarf ekki að lengja námstímann. Nemendur semja um mat á einingum við deildina áður en skiptinámið hefst með því að fylla út námssamning.

Meira um möguleika á námsdvöl erlendis

Mögulegt framhaldsnám með þessa menntun

Bóka viðtal í náms-og starfsráðgjöf

Hvað segja nemendur?

Baldur Logi Björnsson

Brautskráður

Kvikmyndafræði í HÍ kom mér alveg á óvart. Það er svo miklu meira en mann grunar á bakvið hverja einustu kvikmynd sem við sjáum í okkar daglega lífi: kvikmyndasagan, listasagan, menningarpólitík, hugmyndafræði, listræn sýn og þekking, og kennararnir eru einstaklega færir í að sýna okkur hvernig hægt er koma auga á þessa hluti og nota til að gera kvikmyndaáhorfið ríkara. Einnig er námskeiðaúrvalið afskaplega gott og maður lærir að nálgast kvikmyndamenningu heimsins frá óteljandi hliðum, þekkja strauma og stefnur sem skipta máli og kynnist nýjum þjóðarbíóum. Allir sem ég hef talað við hafa fengið eitthvað öðruvísi, einstakt og áhugavert út úr náminu. Í náminu fékk ég einnig tækifæri til að aðstoða við uppbyggingu stafræns gagnagrunns um íslenska kvikmyndasögu sem nefnist Myndvísir, raunar var það vinnan mín eitt sumar. Þar naut ég þess að leysa margvísleg verkefni í samstarfi við annað ástríðufólk. Það er svo gefandi að finna samfélag sem hefur svona mikla ástríðu fyrir því sama og maður gerir sjálfur. Félagslega eru nemendur í kvikmyndafræðinni langsterkasti hópur sem ég hef kynnst í námi.

—

Rósa Ásgeirsdóttir

MA í kvikmyndafræði

Kvikmyndafræði í HÍ snýst um svo margt fleira en aðeins bíómyndir. Námið veitir innsýn í samtímamenningu, heimssögu og ótal fræðigreinar. Fjölbreyttir og framúrstefnulegir áfangar dýpkuðu skilning minn á heimsmenningunni með því að nýta kvikmyndir sem miðil og kennsluefni. Ég skemmti mér innilega vel í tímum sem voru eins og blanda af því að mæta í bíó og hittast með öðrum kvikmyndaunnendum að ræða helsta áhugamálið.

—

Katla Magnúsdóttir

Að mínu mati er kvikmyndafræðin algjört möst fyrir upprennandi leikstjóra, handritshöfunda og framleiðendur. Planið mitt var að taka einungis eitt ár í kvikmyndafræði svo ég gæti farið í skiptinám í kvikmyndagerð. Það tók mig samt ekki langan tíma að átta mig á mikilvægi kvikmyndafræðanna og hvernig þau gera mig að betri kvikmyndagerðarmanni. Í skiptináminu gat ég fært margvísleg rök fyrir öllum mínum ákvörðunum á meðan hinir kvikmyndagerðarnemendurnir gátu það ekki. Kvikmyndafræðin dýpkaði skilning minn á kvikmyndum, Hollywood og sögunni sem skilar sér í því að verkefnin sem ég hef unnið i framhaldinu hafa fyrir vikið verið stórum betri. Þess vegna taldi ég mikilvægt að fara rakleiðis aftur í kvikmyndafræðina eftir skiptinámið til að klára. Kennararnir eru frábærir og skemmtilegar umræður skapast í tímum. Kvikmyndafræðin fær mann til að kafa dýpra.

—

Sólveig Johnsen

Brautskráð

Námið í Kvikmyndafræði við HÍ var virkilega jákvæð og ánægjuleg reynsla fyrir mig. Fyrst og fremst þótti mér frábært að mæta í skólann á morgnana, fá mér kaffi og horfa síðan á bíómyndir. Ræða þær í þaula með öðru áhugafólki og læra um allt það sem býr að baki. Ég öðlaðist skilning á hvernig listir tengjast sögu og samfélagi, hvernig kvikmyndir geta gefið innsýn í mannlegt eðli, sálarlíf og skáldaða heima, og það sem meira er, ég lærði að tjá mig um þetta allt. Námið í Kvikmyndafræði víkkaði sjóndeildarhringinn minn gríðarlega og færði mér ýmis skemmtileg tækifæri, meðal annars að skrifa kvikmyndagagnrýni með góðum hópi fólks og komast af stað í kvikmyndagerð. Kennararnir eru fróðir, áhugasamir og afar hjálplegir, mikið frelsi er í námsvali innan brautarinnar og auðvelt að finna áfanga sem henta ólíkum áhugasviðum.

—

Heiðar Bernharðsson

MA í kvikmyndafræði

Upplifun mín í kvikmyndafræðinni var jákvæð og gefandi. Kennslan er persónuleg og nákvæm, auðvelt er að nálgast kennara ef þörf er á frekari upplýsingum eða innsæi í námið, og augljóst er að velferð þeirra og nemendasamfélagið er þeim mikilvægt. Námið sjálft er vel skipulagt og miðar að minni reynslu frekar að því að fræða nemendur og efla en að klastra þeim saman í einkunnabúnka (eins og maður fær á tilfinninguna í sumum öðrum greinum). Félagslífið er einnig frábært. Nemendafélagið Rýnirinn stendur fyrir miklu og góðu starfi. Ég heyrði til að mynda að árið eftir að ég útskrifaðist hefði hópur upp á annan tug farið saman á kvikmyndahátíðina í Berlín (Berlinale) og þá sá ég í augnablik eftir að hafa útskrifast! En námið í kvikmyndafræðinni er að reynast mér afskaplega gott veganesti.

—