Vísinda- og nýsköpunarverðlaun Háskóla Íslands - í beinni útsendingu á netinu

Vísinda- og nýsköpunarverðlaun Háskóla Íslands verða afhent miðvikudaginn 2. júní kl. 12 í Hátíðasal Aðalbyggingar skólans. Afhending verðlaunanna verður í beinu streymi vegna samkomutakmarkana en viðburðurinn er liður í Nýsköpunarvikunni dagana 26. maí til 2. júní.

Slóð á streymi frá verðlaunaafhendingunni

Metfjöldi tillagna, eða 50, barst í samkeppnina að þessu sinni og verða veitt verðlaun fyrir bestu hugmyndirnar í fjórum flokkum: Heilsa og heilbrigði, Tækni og framfarir, Samfélag og Hvatningarverðlaun. Auk þess verður sigurvegari keppninnar valinn úr hópi verðlaunahafa úr ofangreindum flokkum.

Verðlaunin, sem hétu áður Hagnýtingarverðlaun Háskóla Íslands, eru nú veitt í 23. sinn en keppnin er samstarfsverkefni Háskóla Íslands, Nýsköpunarsjóðs atvinnulífsins, Árnason|Faktor og Auðnu-tæknitorgs.

Á athöfninni munu nemendur Háskóla Íslands og Háskólans í Reykjavík jafnframt fjalla um verkefni sitt sem hlaut Nýsköpunarverðlaun forseta Íslands í upphafi árs.

Viðburðurinn er hluti af Nýsköpunarvikunni, nýrri hátíð í Reykjavík sem fer fram dagana 26. maí -2. júní. Frumkvöðlum og fyrirtækjum gefst tækifæri á að kynna þá skapandi starfsemi sem á sér stað á degi hverjum, opna dyrnar fyrir gestum og gangandi og vekja athygli á þeim framúrstefnulegu lausnum sem hafa sprottið upp úr íslensku hugviti. Nánar á nyskopunarvikan.is