Aldarafmæli Stúdentaráðs fagnað

Stúdentaráð Háskóla Íslands býður til hátíðarhalda í tilefni af aldarafmæli ráðsins. Afmælishátíðin mun fara fram 4. desember í Hátíðasal Aðalbyggingar Háskóla Íslands en vegna samfélagsástandsins verður beint streymi þaðan kl. 18 fyrir gesti heima í stofu.

Afmælið markar stór tímamót í hagsmunabaráttu stúdenta, sem hefur sett svip sinn á samfélagið í heild sinni frá því að stúdentar gengu fyrst til kosninga í desember árið 1920. Sú staðreynd hvetur SHÍ til dáða og áframhaldandi hagsmunagæslu. Stúdentaráð er um þessar mundir að vinna að heimildaþætti um sögu ráðsins og verður sýnishorn frumsýnt á hátíðinni.

Heiðurgestir eru Guðni Th. Jóhannesson, forseti Íslands, sem opnar hátíðina, Katrín Jakobsdóttir forsætisráðherra og Lilja D. Alfreðsdóttir mennta- og menningarmálaráðherra.

Isabel Alejandra Díaz, forseti Stúdentaráðs, og Jón Atli Benediktsson, rektor Háskóla Íslands, munu einnig ávarpa gesti. Þá mun söngkonan GDRN stíga á svið og Vigdís Hafliðadóttir, fyrrverandi stúdentaráðsliði, flytja uppistand.

Stúdentaráð hlakkar mikið til að fagna sögu ráðsins á afmælisdegi þess og vonast til þess að stúdentar og aðrir landsmenn sameinist í fögnuðinum.

Dagskrá:

18:00 Hátíðin sett
18:05 Guðni Th. Jóhannesson, forseti Íslands
18:15 Stikla úr heimildaþætti
18:20 Isabel Alejandra Diaz, forseti Stúdentaráðs
18:30 Jón Atli Benediktsson, rektor Háskóla Íslands
18:40 GDRN
18:50 Lilja D. Alfreðsdóttir mennta- og menningarmálaráðherra
19:00 Vigdís Hafliðadóttir uppistand
19:10 Katrín Jakobsdóttir forsætisráðherra
19:20 GDRN