Náttúruvá - Kjörsvið í meistaranámi í landfræði

Tilgangur með þessu kjörsviði er að efla rannsóknatengt nám á mikilvægu, þverfræðilegu sviði sem varðar sambúð fólks og náttúru, þar sem velferð og miklir hagsmunir eru í húfi bæði hér á landi og annars staðar. Ísland býður einstaka möguleika til náms og rannsókna á þessu sviði.

Markmið með kjörsviðinu er að brautskrá meistaranema sem hafa staðgóða fræðilega og hagnýta þekkingu á náttúruvá af ólíkum tegundum. Þetta tekur til náttúrulegra orsaka og ferla, en einnig til viðbragða samfélaga við slíkri vá. Aukinni tíðni ýmissa veðurtengdra hamfara verður veitt sérstök athygli, en einnig hugað að öðrum tegundum náttúruhamfara sem algengar eru á Íslandi, svo sem eldgosum, jarðskjálftum og jökulhlaupum.

Nemendur fá góða innsýn í aðferðir sem notaðar eru við greiningu á hamfaraatburðum og þjálfun í að beita þeim, sem og í gerð líkana um slíka atburði. Þeir fá einnig þekkingu á kerfi almannavarna hér á landi og ábyrgð hina ýmsu aðila sem koma að vöktun og viðbrögðum við náttúruvá.

Helmingur námsins er bundinn í námskeiðum (60 ECTS) og helmingur í lokaverkefni nemenda. Í lokaverkefnum sínum geta nemendur einblínt á tilteknar hliðar náttúruvár og mótað þau að sínu áhugasviði, efnislega og aðferðafræðilega.

Meðal viðfangsefna

Orsakir og eðli hamfaraatburða
Landfræðileg dreifing náttúruvár á heimsvísu
Tegundir náttúruvár á Íslandi
Ofanflóð og hegðun þeirra
Gerð líkana af hamfaraatburðum
Tengsl náttúruvár og loftslagsbreytinga
Samfélagskenningar um náttúruvá
Viðbrögð ríkra og fátækra samfélaga við vá
Skynjun einstaklinga og hópa á áhættu
Almannavarnahringrásin
Vettvangsferðir og heimsóknir

Inntökuskilyrði

Fyrsta háskólagráða, BS-próf í landfræði eða öðrum greinum sem tengst geta náttúruvá, með lágmarkseinkunn 7,25 (fyrstu einkunn) frá Háskóla Íslands eða sambærilegri einkunn frá öðrum háskóla. Auk þess geta verið gerðar kröfur um undirbúningsnámskeið sem verður að ljúka áður en hægt er að hefja meistaranám.
Umsækjendur skulu skila stuttri greinargerð (1 bls.) þar sem þeir tilgreina hvers vegna þeir hafa áhuga á þessu námi, markmið með náminu og hugsanlegt viðfangsefni í meistararitgerð.
Öllum umsóknum skulu fylgja meðmæli frá 2 einstaklingum (kennurum/yfirmönnum) sem þekkja vel til umsækjanda og geta veitt honum skýra umsögn. Umsagnaraðilar þurfa að skila skriflegum umsögnum beint til Háskóla Íslands á netfangið umsokn@hi.is. Ef nemandi er að sækja um áframhaldandi nám í sömu deild þarf ekki að skila skriflegum umsögnum/meðmælabréfum.

Námið hentar breiðum hópi. Tekið er við umsóknum frá fólki með grunnnám úr landfræði að baki, en ekki síður nám úr ýmsum öðrum greinum vísinda. Ef þörf er á tiltekinni þekkingu, sem einhverjir umsækjendur hafa ekki úr grunnnámi sínu verður bent á tiltekin námskeið sem undanfara.

Störf að loknu námi

Að námi loknu eiga nemendur að vera færir um að starfa á fjölbreyttum vettvangi innan ýmissa opinberra stofnana, frjálsra félagasamtaka, fyrirtækja og annarra aðila sem láta sig náttúruvá varða. Möguleg starfssvið tengjast m.a. viðbrögðum við einstökum atburðum, skipulagi byggðar með hliðsjón af mögulegri náttúruvá og vöktun á ferlum sem tengjast slíkri vá eða rannsóknum á sviðinu.