Sænsk málnotkun I (SÆN101G)

Lögð verður áhersla á talað mál, orðaforða, ásamt færni í að tala eðlilega og fjölbreytta sænsku. Markmiðið er að nemendur nái góðum tökum á að nota sænsku til tjáskipta. Lestur, talmál, munnlegar æfingar í nútímasænsku. Ætlast er til að nemendur hafi a.m.k. grunnþekkingu í sænsku fyrir. Nemendur í fjarnámi gera æfingar skriflega eða taka upp myndbönd eða hljóðskrár þar sem þeir svara spurningum vikunnar.

Lokaprófið er munnlegt fyrir alla og þá á Teams fyrir þá sem komast ekki á staðinn.

Sænskar bókmenntir frá sósíalrealisma til okkar daga (SÆN102G)

Námskeiðið er inngangur að sænskum bókmenntum frá uppgangsárum verkamannabókmennta í Svíþjóð um 1930 til okkar daga.

Í hverri viku fá nemendur s.k. námsbréf þar sem ákveðnar stefnur úr bókmenntasögu Svía eru teknar fyrir, eins og glæpasögur, póstmódernismi og barnabókmenntir. Þá fylgja þessum námsbréfum spurningar sem eru æfingar fyrir lokaprófið.

Námskeiðið byrjar á rithöfundum sem byrjuðu að vera virkir fyrir og eftir lok seinni heimstyrjaldar eins og Ivar Lo-Johansson, Moa Martinson, Astrid Lindgren, og Nóbelsverðlaunahöfundinum Tomas Tranströmmer. Þaðan verður meðal annars farið í samfélagsgagnrýni sjöunda áratugarins, póstmódernisma níunda áratugarins og skáldaðar ævisögur okkar daga.

Miðannarverkefnið er munnleg kynning á smásögu sem nemendur lesa í verkefnavikunni.

Lokaprófið er skriflegt og fer þannig fram að nemendur fá fjórar spurningar og velja þrjár þeirra að skrifa um. Nemendur eiga að fara yfir texta og setja þá í samhengi, til dæmis með því að velja hvaða stefnur þeir tilheyra og fjalla um stílinn í textabrotunum.

Stiklur um sænskt samfélag (SÆN105G)

Þetta námskeið býður upp á yfirlit yfir lykilatburði og áhrifamikla einstaklinga í sænsku samfélagi og sýnir hvernig þeir hafa mótað menningarlega og stjórnmálalega sjálfsmynd sænsku þjóðarinnar. Námskeiðið veitir innsýn í sænska siðferði og lífshætti, allt frá angurværu aðdráttarafli leikkonunnar Gretu Garbo til hinnar dýrmætu fika hefðar og djúpstæðra áhrifa morðsins á forsætisráðherranum Olof Palme árið 1986.

Sænsk málfræði I (SÆN106G)

Farið yfir grundvallaratriði í sænskri málfræði. Í námskeiðinu er áherslan lögð á beygingarfræði. Fjallað verður um orðflokkana og gefið yfirlit yfir uppbyggingu og beygingu orða. Veittur verður fræðilegur grunnur ásamt því að nemendur geri skriflegar æfingar.

Orðaforði og orðmyndun (SÆN111G)

Markmið námskeiðsins er að auka orðaforða nemenda. Námskeiðið skiptist í merkingarfræðihluta og orðmyndunarhluta. Fjallað verður um fyrirbrigði eins og merkingu, samhljóða orð, samheiti og skammstafanir. Í seinni hluta námskeiðsins verður sjónum beint að orðmyndun, nýyrðum og tökuorðum.

Hagnýt sænska (SÆN112G)

Námskeiðið er fyrir nemendur sem óska eftir grunnþekkingu í sænsku máli sem er hægt að nota á hagnýtan hátt annað hvort í námi eða starfi í Svíþjóð. Námið inniheldur vikulegar æfingar í Canvas í skriflegu formi en einnig æfingar sem gerðar eru í tíma eða heima þar sem nemendur fá að æfa framburð og tjáningu á sænsku. Nemendur læra helstu orð og frasa sem notuð eru í daglegu tali og fá einnig að æfa hagnýta málfræði þar sem áherslan er á notkun en ekki fræði.

Svíþjóð í tónum - frá Gamla Nóa til ABBA (SÆN109G)

Námskeiðið er kynning á sænskri tónlist með sérstakri áherslu á tónlist sem slegið hefur í gegn á heimsvísu, en einnig verður farið yfir sænska tónlistarsögu og sænska vísnahefð. Fjallað verður sérstaklega um ABBA og áhrif þessarar hljómsveitar, nútímapopptónlist og tónlist í samfélagslegu samhengi. Nemendur eru hvattir til að hlusta á sænska tónlist og mynda sína eigin skoðun um hana sem og að greina hana.

Sænsk málnotkun II (SÆN201G)

Lögð verður áhersla á talað mál og ritað mál. Markmiðið er að nemendur nái góðum tökum á að nota sænsku til tjáskipta. Talað og ritað mál, munnlegar og skriflegar æfingar í nútímasænsku.

Félagsleg málvísindi og sænskar mállýskur (SÆN203G)

Markmið námskeiðisins er að kynna nemendum helstu viðfangsefni í félagslegum málvísindum. Meðal annars verður fjallað um kyn-, aldurs- og svæðisbundna málnotkun, innflytjendamál og áhrif þeirra á sænskuna, samtalsgreiningu og áhrif viðhorfa málnotenda á tungumálið. 

Þýðingar (sænska) (SÆN205G)

Í námskeiðinu fást nemendur einkum við að þýða texta úr sænsku og á móðurmál sitt.

Skoðaðir verða ýmsar gerðir texta, bæði fagtextar og bókmenntatextar. Textarnir eru fengnir úr bókum, dagblöðum, bæklingum og af vefsíðum stofnana. Þýðingar á fagurbókmenntum verða teknar til sérstakrar athugunar. Nemendur þýða stutta texta og rædd verða þýðingavandamál sem upp koma eins og orðasambönd og menningarbundin atriði og hugað að mismunandi lausnum á þeim. Grunnatriði í þýðingarfræðum verða kynnt og nemendur kynna sér ritgerðir sem fjalla um rannsóknir á þýðingum.

Sænsk málfræði II (SÆN206G)

Sænsk málfræði II er framhald af Sænskri málfræði I en ekki er þó nauðsynlegt að hafa lokið því námskeiði. Fjallað verður um sænska beygingarfræði, sérstaklega fallorð og sagnorð. Kynnt verða hugtök á borð við persónuhætti og fallhætti og agnarsagnir. Innan setningafræði verður fjallað um setningar, setningarliði og greiningu á setningarhlutum. Einnig verður rætt um orðaröð og upplýsingaflæði.

Sænskar bókmenntir frá Víkingaöld til módernisma (SÆN211G)

Námskeiðið er inngangur að sænskum bókmenntum frá rúnum á Víkingaöld til gullaldar sænsks módernisma. Í hverri viku fá nemendur stutta texta úr mikilvægum ritum og bókum í sænskri málsögu og svara síðan spurningum um þessa texta. Spurningarnar undirbúa nemendur fyrir lokaprófið.

Námskeiðið byrjar á rúnasteininum Rökstenen frá um 800 og svo verður farið fram í tímann vikulega. Þá verða tekin fyrir atriði eins og málfræði, stafsetning, orðmyndun og menningarlegt innihald. Í lok námskeiðsins fá nemendur að kynnast frægum rithöfundum eins og August Strindberg, Selma Lagerlöf og Hjalmar Söderberg.

Munnlegt miðannarverkefni virkar þannig að nemendur búa til stutta kynningu um efni sem kennarinn lætur þá fá í verkefnavikunni. Nemendur geta flutt kynninguna í tíma eða í gegnum myndband ef þeir vinna í fjarnámi eða netnámi.

Lokaprófið er skriflegt og fer þannig fram að nemendur fá fjórar spurningar og velja þrjár þeirra að skrifa um. Spurningarnar geta verið um forna málfræði, um rithöfunda og líf þeirra, og um innihald ákveðinna verka.