Frestur til að sækja um Erasmus+ styrki til starfsþjálfunar er til og með 1. apríl ár hvert (eða næsta virka dag ef umsóknarfrestur er á almennum frídegi). Heimilt er að sækja um eftir auglýstan umsóknarfrest en þeir sem sækja um fyrir 1. apríl hafa forgang við úthlutun styrkja. Nemendur sem eru að brautskrást verða að sækja um styrkinn eigi síðar en tveimur mánuðum fyrir brautskráningu. Ekki er tekið á móti umsóknum um styrkinn ef sótt er um eftir þann frest. Sótt er um styrkinn til Alþjóðasviðs. Einnig þarf tengiliður deildar/fags að gefa samþykki sitt fyrir starfsþjálfuninni. Það er gert við undirritun starfsþjálfunar námssamningsins sem er fylgiskjal með umsókninni um styrkinn. Ekki er tekið við umsóknum ef áætluð brottför er innan sex vikna. Nemendur eru hvattir til þess að sækja um að minnsta kosti þremur mánuðum fyrir brottför. Nemendur sem hyggja á starfsþjálfun þurfa að sinna árlegri skráningu líkt og aðrir nemendur og greiða skráningargjald við HÍ. Hægt er að skrá sig án þess að velja námskeið fyrir komandi skólaár og er starfsþjálfunarnemum ráðlagt að gera það. Nemendur sem hyggja á starfsþjálfun eftir útskrift eru undanþegnir þessu. Umsóknarferlið 1. Nemandi ákveður að fara í starfsþjálfun sem tengist náminu og finnur móttökustofnun og ákveður í hversu langan tíma dvölin er áætluð 2. Nemandi fyllir út rafræna umsókn Umsókn um Erasmus+ starfsþjálfunarstyrk Fylgiskjöl eru hengd við umsókn: i. Skannað einkunnayfirlit (ekki meira en mánaðargamalt) ii. Skjalið starfsþjálfunar námssamningur undirritað af tengilið deildar/fags að lágmarki. Undirskrift móttökuaðila má koma síðar. Nemendur geta sótt um viðbótarstyrki úr Erasmus+ áætluninni í rafrænu umsókninni. Með því að senda inn umsókn gefa nemendur Alþjóðasviði leyfi til þess að nota þær upplýsingar sem gefnar eru upp í umsókninni og koma fram á fylgigögnum við úrvinnslu umsóknarinnar. Þessar upplýsingar eru geymdar ótímabundið. Alþjóðasvið getur tekið allt að fjórar vikur að vinna úr umsóknum. Nemendur fá upplýsingar um styrkúthlutun í tölvupósti. Eftir að vilyrði fyrir styrk hefur borist: Nemandi klárar starfsþjálfunar námssamning og fær undirskrift frá móttökustofnun. Fullundirrituðum samningi er svo skilað til Alþjóðasviðs. Athugið að þessu þarf að ljúka að lágmarki einum mánuði fyrir brottför. Nemendur fá þá sendan styrksamning og yfirlýsingu skiptinema sem skila þarf til Alþjóðasviðs. Við heimkomu: Nemendur og móttökustofnun fylla út staðfestingu á dvöl (After the Mobility) og skila til Alþjóðasviðs. Nemendur svara einnig lokaskýrslu Erasmus+ sem er send í tölvupósti. facebooklinkedintwitter
