Algengar spurningar

Þú getur sótt um að fá nám frá annarri deild eða öðrum skóla metið til eininga inn í núverandi nám þitt hjá deildinni þinni.

Frekari upplýsingar um mat á fyrra námi má finna hér 

Þú berð ábyrgð á þínu námi og skráir þig í öll námskeið í Uglu.
Í mars á hverju ári verður þú að velja námskeið fyrir næsta skólaár ef þú ætlar að halda áfram í núverandi námi.

Þú skráir þig með því að smella á borðann sem birtist efst í Uglu.
Mundu eftir að staðfesta valið með því að smella á „Vista“ neðst á síðunni.

Þurfir þú af einhverjum ástæðum aðstoð við námskeiðaskráningu getur þú leitað til Nemendaskrár.

Í upphafi hvors misseris, til 5. september á haustmisseri og til 21. janúar á vormisseri, getur þú breytt námskeiðaskráningunni í Uglu.  
Þú þarft að skrá þig úr námskeiði í síðasta lagi 1. október vegna prófa á haustmisseri og 1. febrúar vegna prófa á vormisseri. Athugið aðrar dagsetningar eiga við um námskeið sem kennd eru í lotum.

Í mars á hverju ári fer fram skráning í áframhaldandi nám í Uglu þar sem þú getur jafnframt óskað eftir því að skipta um aðalfag. Þú skráir þig með því að smella á borðann sem birtist í Uglu og smellir á hlekkinn um að skipta um námsleið.

Þetta gildir einnig í upphafi hvors misseris þegar þú getur breytt námskeiðaskráningunni. Athugaðu að slíkar breytingar geta verið bundnar við misseri, þ.e. að ekki er hægt að hefja nám á vormisseri á öllum námsleiðum.

Ef þú vilt skrá þig í aukagrein þarftu að senda tölvupóst til Nemendaskrár (nemskra@hi.is).

Nemendaskrá sér um skráningu aukagreina. Til að fá aukagrein skráða á bakkalárnámsferil þinn þarftu að senda beiðni um það með tölvupósti úr HÍ netfanginu þínu á nemskra@hi.is. Mundu að setja kennitölu þína með í tölvupóstinn.

Hér má finna frekari upplýsingar um aðalgreinar og aukagreinar 

Best er að leita til Nemendaþjónustu þinnar deildar/sviðs til þess að láta fara yfir námsferil. 

Ef skila þarf staðfestum gögnum á pappír er hægt að fá stimplað og undirritað námsferilsyfirlit á Þjónustuborðinu Háskólatorgi gegn framvísun skilríkja eða sent í bréfpósti á lögheimili þitt. Stafrænt undirritað námsferilsyfirlit er hægt að panta með því að senda tölvupóst á haskolatorg@hi.is. Yfirlit kostar 350 kr. fyrir hvern námsferil.

Alþjóðasvið tekur við umsóknum frá nemendum Háskóla Íslands sem hyggjast fara utan sem skiptinemar og annast samskipti við samstarfsskólann. Nánari upplýsingar má sjá á vef skrifstofunnar.

Umsóknarfrestur til að sækja um skiptinám er 1. febrúar ár hvert

Þeir sem hyggja á nám erlendis á eigin vegum geta snúið sér til Upplýsingastofu um nám erlendis. Upplýsingastofan veitir góð ráð við undirbúning og gerð umsókna, forkröfur s.s. tungumálapróf, auk annarra hagnýtra atriða sem hafa þarf í huga.

Á vef upplýsingastofunnar farabara.is má finna ýmsar gagnlegar upplýsingar um umsóknarferli, lönd og skóla - auk lista yfir fjölmarga styrki sem standa námsmönnum á Íslandi til boða.

Allar nánari upplýsingar má finna á vef upplýsingastofunnar, en nemendum er einnig velkomið að hafa samband símleiðis eða með tölvupósti upplysingastofa@rannis.is.

Matsskrifstofa gegnir hlutverki ENIC/NARIC upplýsingaskrifstofu um mat og viðurkenningu náms, samkvæmt samningi við mennta- og menningarmálaráðuneytið.
Matsskrifstofa er á 3. hæð í Setbergi. Deildarstjóri er Gísli Fannberg.

• Netfang: enicnaric@hi.is.
• Sími: 525-5452 / 525-5256

Sjá upplýsingar um undanþágur frá formlegum inntökuskilyrðum í bakkalárnám hér.

Athugið að ekki er tekið við umsóknum um undanþágur frá stúdentsprófi þegar sótt er um nám sem hefst á vormisseri.

Upplýsingar um fjarnám í boði við Háskóla Íslands má finna hér.