Yfir sexhundruð erlendir nýnemar hefja nám í haust
Kynningardagar fyrir erlenda nemendur við Háskóla Íslands hefjast í dag og standa til 25. ágúst. Yfir sex hundruð erlendir nemar hefja nám í haust, þar af tæplega 280 skiptinemar og rúmlega 320 á eigin vegum. Markmið daganna er að kynna þjónustu Háskólans og styðja nemendur í að aðlagast nýrri menningu og kynnast öðrum nemendum.
Á dagskrá eru spennandi námskeið, skipulagðar gönguferðir um háskólasvæðið, móttaka með tónlist og léttum veitingum, kynningar fræðasviða og viðburðir á vegum Stúdentaráðs.
Náms- og starfsráðgjöf býður upp á námskeiðið The Keys to Success at the University of Iceland þar sem nemendur fá leiðbeiningar um hvernig vænlegast sé að ná árangri í námi við Háskólann og njóta dvalarinnar á Íslandi. Þá geta áhugasamir nemendur tekið þátt í örnámskeiði í íslensku, Icelandic in 90 minutes. Landsbókasafn Íslands – Háskólabókasafn verður auk þess með kynningar á safninu og þjónustu þess.
Á fimmtudeginum 24. ágúst verður öllum erlendum nemendum boðið til móttöku á Háskólatorgi þar sem Steinunn Gestsdóttir, aðstoðarrektor kennslu og þróunar, og Ragna Sigurðardóttir, formaður Stúdentaráðs, flytja ávörp. Alþjóðanefnd Stúdentaráðs býður upp á gönguferðir um háskólasvæðið, Sindri Freyr Guðjónsson treður upp og boðið verður upp á grillaðar pylsur. Dagskráin heldur svo áfram í Stúdentakjallaranum með lifandi tónlist.
Kynningar fræðasviða eru einnig hluti af dagskrá kynningardaganna.
