World Robot Olympiad kemur til Íslands

Ísland verður frá og með vorinu 2027 hluti af World Robot Olympiad (WRO), einni stærstu alþjóðlegu vélmenna- og STEM-keppni heims fyrir ungt fólk. Markmiðið er að byggja upp öfluga árlega keppni hér á landi þar sem nemendur á ólíkum aldri geta tekist á við skapandi áskoranir í forritun, verkfræði, nýsköpun og vélmenntækni.

World Robot Olympiad var stofnað árið 2004 og hefur starfsemin síðan náð til meira en 175.000 ungmenna um allan heim. Í dag taka um 32.100 lið þátt í WRO í yfir 100 virkum aðildarlöndum.

Í keppninni vinna nemendur saman í liðum að því að hanna, smíða og forrita vélmenni og þróa lausnir við fjölbreyttum áskorunum. Áherslan er ekki aðeins á tæknilega færni heldur einnig á sköpunargáfu, lausnaleit, samvinnu og nýsköpun.

Byggt á meira en tveggja áratuga reynslu

Háskóli Íslands hefur staðið fyrir FIRST LEGO League á Íslandi í meira en tvo áratugi. Þar hafa kynslóðir grunnskólanemenda fengið tækifæri til að kynnast forritun, verkfræði og vísindum í gegnum verklegt og skapandi nám.

World Robot Olympiad er næsta skref í þeirri uppbyggingu. Keppnin býður upp á fjölbreyttari vélmennaáskoranir fyrir mismunandi aldurshópa, gefur kost á notkun fjölbreyttari vélmennabúnaðar og nær til stærri hóps ungs fólks en áður. Þar á meðal eru framhaldsskólanemar sem hingað til hafa haft færri tækifæri til þátttöku í keppnum af þessu tagi hér á landi.

Langtímamarkmiðið er að skapa stóran árlegan viðburð fyrir ungt fólk á ólíkum aldri og byggja upp skýra leið frá fyrstu kynnum af forritun og vélmenntækni yfir í sífellt þróaðri verkefni á sviði verkfræði og nýsköpunar.