Samstarf um Mannréttindaflokk í Nýsköpunarkeppni grunnskólanna
Háskóli Íslands, fyrir hönd NýMenntar á Menntavísindasvið skólans og Nýsköpunarkeppni grunnskólanna (NKG og NKG+), ÖBÍ réttindasamtök og FabLab Hátúni 10C hafa undirritað þriggja ára samstarfssamning um að bæta við Mannréttindaflokki í Nýsköpunarkeppni grunnskólanna.
Markmið samstarfsins er að auka vitund grunnskólabarna um málefni fatlaðs fólks og raunveruleika þess, jafnframt því að hvetja börn og ungmenni til nýsköpunar sem tengist áskorunum og tækifærum í lífi fatlaðs fólks. Sérstök áhersla er lögð á inngildandi hönnun, aðgengi og lausnir sem stuðla að samfélagslegri þátttöku og valdeflingu fatlaðs fólks, bæði í leik og starfi.
Samstarfið felur jafnframt í sér þróun og miðlun kennslu- og fræðsluefnis fyrir grunnskóla um mannréttindi, fötlun og inngildandi hönnun. Við gerð námsefnisins verður lögð áhersla á samráð við fatlað fólk og tekið mið af sjónarmiðum þeirra. Námsefnið er ætlað að styðja kennara í kennslu og verkefnavinnu tengdri Mannréttindaflokki keppninnar.
ÖBÍ leggur til verðlaunafé í Mannréttindaflokki að heildarupphæð allt að 300.000 krónur á samningstímabilinu, auk 700.000 kr. framlags til að bæta aðgengi að keppninni. NýMennt annast kynningu flokksins, styður nemendur við hugmyndaþróun og tryggir sýnileika ÖBÍ sem samstarfs- og styrktaraðila. FabLab Hátúni 10C leggur til aðgang að aðstöðu og sérfræðiráðgjöf til að styðja nemendur við áframhaldandi þróun hugmynda og frumgerða, einkum í tengslum við NKG+, sem er hugmynda- og frumgerðakeppni fyrir 8.-10.bekk.
