Innblástur og ávinningur: Árleg Aurora-ráðstefna í augum stúdenta
Þórkatla Eggerz Tinnudóttir, grunnnemi í stjórnmálafræði, og Muhammad Muzammal Mustafa, meistaranemi í alþjóðaviðskiptum og verkefnastjórnun, hafa í gegnum þátttöku Háskóla Íslands í Aurora-samstarfinu fengið einstakt tækifæri til að vaxa í námi, kynnast nýju fólki og mynda ný tengsl á sama tíma og þau hafa lært nýja hluti og kynnst nýjum menningarheimum. Þau tóku bæði þátt í árlegri ráðstefnu Aurora-háskólanetsins ásamt nemendum og starfsfólki háskóla víðs vegar að úr Evrópu en ráðstefnan fór fram dagana 18.–21. maí í borginni Duisburg í vesturhluta Þýskalands. Þau deila hér reynslu sinni af þátttöku í Aurora-samstarfinu.
„Aurora er eitt umfangsmesta alþjóðlega samstarfsverkefnið sem Háskóli Íslands tekur þátt í ásamt á annan tug háskóla, þar á meðal háskólanum í Duisburg-Essen sem hýsti ráðstefnuna að þessu sinni.
Í tíu ár hafa evrópskir háskólar unnið saman innan Aurora-netsins að kennsluþróun, eflingu rannsóknasamstarfs og tengslamyndun og þannig byggt upp sterkari grunn fyrir háskólamenntun í sífellt krefjandi heimi. Einn mikilvægasti þáttur þessa samstarfs er þátttaka og fulltrúastarf nemenda.
Tíu ára afmæli Aurora-samstarfsins var fagnað á ráðstefnunni í Duisburg og hér sést Silja Bára R. Ómarsdóttir, rektor HÍ, skera afmælistertu sem gestum var boðið upp á í tilefni tímamótanna. MYND/Aurora
Áhugaverðar vinnustofur
Á dagskrá ráðstefnunnar voru vinnustofur, pallborðsumræður og uppbyggileg samtöl yfir kaffibollum sem undirstrikuðu mikilvægi samskipta þvert á einingar og hópa háskólasamfélagsins.
Vinnustofa um samfélagslega frumkvöðlaverkfærið seizmic gaf okkur innsýn í hvernig félagsleg nýsköpun og samstarf geta bæði eflt og styrkt alþjóðlegt samstarf. Seizmic er notað innan alls Aurora-samstarfsins og tengist meðal annars námskeiðum eins og Kveikju (e. Spark Social) við Háskóla Íslands og námskeiðinu Tourism, Social Entrepreneurship and Sustainability við Copenhagen Business School. Verkfærið felur í sér smáforrit sem auðveldar samskipti á milli námskeiða, virkra verkefna og rannsakenda og ýtir undir samstarf og að þátttakendur geti lært hver af öðrum.
Vinnustofa um hugmyndina að baki svokallaðri „Auroriseringu“ náms gaf þátttakendum tækifæri til að læra hvernig hægt er að setja upp gott Aurora-námskeið fyrir nemendur allra aðildarháskólanna auk þess sem nemendur fengu tækifæri til að miðla reynslu sinni af Aurora-námskeiðum, ræða hvað hefði reynst vel og hvað mætti bæta. Nánar má lesa um kennslufræðilega nálgun Auroriseringar námskeiða hér.
Mikilvægi þátttöku nemenda
Fulltrúastarf nemenda hefur ávallt verið lykilþáttur í Aurora-samstarfinu enda eru stúdentar einn helsti burðarás háskólasamfélagsins. Pallborð sem var skipulagt og stýrt af stúdentaráði Aurora varpaði ljósi á hvernig nemendur og kennarar geta unnið saman að því að gera Aurora-námskeið skilvirkari, stuðla að inngildandi námi og eflt gagnkvæman skilning á háskólakerfinu til að bæta það. Einnig var kynnt endurskoðuð sameiginleg réttindaskrá nemenda í Aurora-skólum, sem unnin var á yfirstandandi skólaári og verður brátt tilbúin til innleiðingar. Samkvæmt henni er stefnt að því að tryggja nemendum virka þátttöku í starfsemi háskóla og stjórnsýslu þeirra.
Meðal þátttakenda í pallborðinu var Alma Ágústsdóttir, verkefnastjóri á alþjóðasviði Háskóla Íslands, fyrrverandi alþjóðafulltrúi Stúdentaráðs HÍ og fyrrverandi forseti Stúdentaráðs Aurora. Alma stýrir vinnuhópi á vegum Aurora-samstarfsins sem snýr að aukinni og öflugri stúdentaþátttöku innan Aurora-netsins og ræddi hvernig hægt væri að tryggja að rödd stúdenta heyrist í ýmsum verkefnum og hópum Aurora-samstarfsins. Þá ræddu þátttakendur einnig um mögulegar leiðir til að umbuna fyrir sjálfboðastarf þeirra fjölmörgu nemenda sem leggja sitt af mörkum til verkefna innan Aurora, hvort sem það væri með ECTS-einingum, viðurkenningarskjölum eða öðrum hætti, en slík vinna er knúin áfram af einlægri ástríðu fyrir eflingu félagslegrar og fræðilegrar þátttöku nemenda.
Pallborð sem var skipulagt og stýrt af stúdentaráði Aurora varpaði ljósi á hvernig nemendur og kennarar geta unnið saman að því að gera Aurora-námskeið skilvirkari, stuðla að inngildandi námi og eflt gagnkvæman skilning á háskólakerfinu til að bæta það. Meðal þátttakenda í pallborðinu var Alma Ágústsdóttir, verkefnastjóri á alþjóðasviði Háskóla Íslands, fyrrverandi alþjóðafulltrúi Stúdentaráðs HÍ og fyrrverandi forseti Stúdentaráðs Aurora. MYND/Aurora
Framlag stúdenta sem Aurora-sendiherra
Mikilvægur liður í þátttöku nemenda í Aurora-samstarfinu, bæði innan sinna háskóla og á alþjóðlegum vettvangi, hefur verið Ambassador-verkefnið, sem veitir hópi nemenda við hvern háskóla virkt hlutverk í að móta Aurora-samfélagið sem núverandi nemendur en rannsakendur og leiðtogar morgundagsins. Sem Aurora-Ambassadorar tökum við þátt í að vekja athygli á tækifærum innan Aurora-samstarfsins, svo sem Aurora-námskeiðum sem fela í sér stutta dvöl við annan Aurora-háskóla og eru frábær valkostur til jafns við lengra skiptinám. Auk þess skipuleggjum við og tökum þátt í viðburðum sem efla tengsl stúdenta innan okkar háskóla og þvert á Aurora-háskólana og tengjast markmiðum Aurora-samstarfsins um aukinn hreyfanleika í námi og þróun sameiginlegs, alþjóðlegs nám.
Langvarandi vináttubönd geta myndast á örfáum dögum við nám erlendis og Ambassador-verkefnið hefur orðið ómetanlegur hluti af þátttöku nemenda innan Aurora. Verkefnið heldur áfram að þróast og styrkjast með hverju árinu. Við hvetjum alla nemendur Háskóla Íslands sem hafa áhuga á að taka þátt í Aurora til að sækja um að gerast Aurora Ambassadorar þar sem það er ein besta leiðin til að tengjast fólki með ólíkan bakgrunn og styrkja nemendasamfélagið bæði innan okkar háskóla og yfir landamæri.
Þátttaka í Aurora-samstarfinu skapar nemendum fjölbreytt tækifæri til að vaxa í námi, kynnast nýju fólki og mynda ný tengsl á sama tíma og þau læra nýja hluti og kynnast nýjum menningarheimum. MYND/Aurora
Á ráðstefnunni komu tveir Ambassadorar frá hverjum Aurora-háskóla saman og tóku þátt í sameiginlegri vinnustofu um eina árangursríkustu námsaðferð sem Aurora-nemendur hafa notað í samstarfi sínu: jafningjafræðslu (e. peer-to-peer learning). Kostir jafningjafræðslu felast meðal annars í aukinni virkni, umræðum og betri getu til að takast á við fjölbreyttan menningarlegan bakgrunn. Með þessum hætti geta nemendur deilt verkefnum og útskýrt hugmyndir sínar fyrir hver öðrum á skilvirkan hátt.
Ef þú hefur áhuga á að taka þátt í Aurora eftir lestur þessarar greinar hvetjum við þig til að fylgjast með kynningarfundum og tilkynningum um Aurora-tækifæri sem berast með tölvupósti næsta skólavetur. Við hvetjum þig eindregið til að sækja um að verða Aurora Ambassador, skoða Aurora-námskeiðin sem verða í boði og skrá þig í þau. Án þátttöku nemenda getur Aurora-samstarfið ekki stuðlað að því að móta rannsakendur, vísindafólk og leiðtoga framtíðarinnar.“
Höfundar: Þórkatla Eggerz Tinnudóttir, grunnnemi í stjórnmálafræði, og Muhammad Muzammal Mustafa, meistaranemi í alþjóðaviðskiptum og verkefnastjórnun. Höfundarnir taka báðir þátt í Aurora Ambassador verkefninu.
Frekari upplýsingar um Aurora-samstarfið má nálgast hér.
