Greinasafn um samspil trúarlegra og veraldlegra þátta í bókmenntum
Út er komin bókin The Sacred and the Profane in premodern Icelandic literature, ca. 1500–1800 í ritstjórn Margrétar Eggertsdóttur, rannsóknarprófessors við Árnastofnun, Katelin Marit Parsons, lektors við Íslensku- og menningardeild Háskóla Íslands og Aðalheiðar Guðmundsdóttur, prófessors við sömu deild. Útgefandi er bókaforlagið De Gruyter.
Í bókinni eru tólf greinar byggðar á fyrirlestrum sem fluttir voru á ráðstefnu sem haldin var í Reykjavík árið 2022. Ráðstefnan var liður í rannsóknarverkefninu Hið heilaga og hið vanheilaga í íslenskum bókmenntum síðari alda sem styrkt var af Rannís á árunum 2021–2024. Viðfangsefni verkefnisins var að skoða samspilið milli trúarlegra og veraldlegra þátta í handritum og prentuðum bókmenntum á ýmsum tímabilum bókmenntasögunnar. Bókinni er skipt niður í þrjá hluta sem nefnast Constructing Literature, Between the Sacred and the Profane og Materiality and Mediality. Hún kemur út í ritröðinni The Northern Medieval World: On the margins of Europe.
Í bókinni eru tekin fyrir ólík og fjölbreytt bókmenntaverk og fjallað um viðtökur þeirra á tímabili í sögu Íslands sem lítið hefur verið rannsakað. Hin hefðbundna tvískipting texta í trúarlega og veraldlega er tekin til endurskoðunar í þeim tilgangi að nálgast verkin á heildstæðari hátt þannig að hægt sé að greina hið heilaga í hinu vanheilaga og öfugt. Tólf fræðimenn eru höfundar greinanna þar sem ýmsar bókmenntagreinar, svo sem þulur, rímur og sálmar, koma við sögu. Í inngangi bókarinnar er fjallað ítarlega um bókmenntalega og menningarlega þróun á Íslandi eftir 1500 um leið og gefin er innsýn í bókmenntaástand á Íslandi eftir siðaskipti, bæði hvaða mynd hefur verið dregin upp af því og hvernig það hefur verið túlkað.
Höfundar greina:
- Haraldur Hreinsson
- Katelin Marit Parsons
- Alice Bower
- Pétur Húni Björnsson
- Natalie M. Van Deusen
- Philip Lavender
- Þórunn Sigurðardóttir
- Margrét Eggertsdóttir
- Aðalheiður Guðmundsdóttir
- Ermenegilda Müller
- Yelena Sesselja Helgadóttir
- Lea D. Pokorny
