Fimm rannsóknarverkefni á Menntavísindasviði hlutu styrk úr Menntarannsóknasjóði

Fimm fjölbreytt rannsóknarverkefni á Menntavísindasviði hlutu styrk úr Menntarannsóknasjóði. Spunagreind, efling leiðsagnar og ráðgjafar við nám og kennslu, stafræn tækni í lífi barna, menntun til hnattrænnar borgaravitundar og þáttaka framhaldsskólans í lýðræðissamfélagi koma við sögu í rannsóknum fimm styrkhafa Menntarannsóknarsjóðs en heildarupphæð styrkja er 148.5 m.kr.

Eftirfarandi verkefni hlutu styrk að upphæð 29,7 m.kr. hvert:

• Guðrún Ragnarsdóttir, prófessor við Menntavísindasviði HÍ: Að efla nám og kennslu með markvissri leiðsögn og ráðgjöf: Heildstæð íhlutunarrannsókn í leik-, grunn- og framhaldsskólum.
• Hannes Ottósson, lektor við Menntavísindasvið HÍ: Framtíð grunnskóla á Íslandi á tímum spunagreindar: Athafnakostir, læsi og hæfni kennara.
• Sara Margrét Ólafsdóttir, dósent við Menntavísindasvið HÍ: Stafræn tækni í lífi barna (STÍL).
• Eva Harðardóttir, lektor við Menntavísindasvið HÍ: Menntun til hnattrænnar borgaravitundar í íslenskum UNESCO-framhaldsskólum: Efling náms- og félagsumhverfis með þátttöku kennara og nemenda.
• Valgerður S. Bjarnadóttir, dósent við Menntavísindasvið HÍ: Framhaldsskóli á tímum samfélagslegra áskorana: Að virkja gagnrýna hugsun og ábyrga þátttöku í lýðræðissamfélagi.

Markmið sjóðsins er að styrkja stoðir hagnýtra menntarannsókna, auka tækifæri til að skapa og miðla þekkingu til framþróunar og farsældar í skólastarfi og styðja við framkvæmd menntastefnu.
Úthlutunarnefnd skipuð fulltrúum mennta- og barnamálaráðuneytis, Kennarasambands Íslands, Miðstöðvar menntunar og skólaþjónustu, Sambands íslenskra sveitarfélaga og Samstarfsnefndar háskólastigsins mat umsóknir og gerði tillögu til mennta- og barnamálaráðherra um styrki.

Styrkhöfum er óskað innilega til hamingju!