![Opið hús 2. apríl - á vefsíðu Háskóla Íslands](https://www.hi.is/sites/default/files/styles/textas__a_-_efsta_mynd/public/bgisla/kri_herferd_2022_220207_003_0.jpg?itok=IQuZGJb7)
Opið hús verður á Háskólatorgi Háskóla Íslands laugardaginn 2. apríl nk. milli kl. 12 og 15. Þá gefst kjörið tækifæri til að kynna sér allt grunnnám og framhaldsnám sem er í boði í HÍ.
Leitaðu að námi sem þú hefur áhuga á hér fyrir ofan og sjáðu hvar það verður kynnt.
Hægt er að velja á milli hátt á fjórða hundrað námsleiða sem gefa spennandi tækifæri í atvinnulífi og samfélagi að námi loknu.
Nemendur og kennarar verða á staðnum ásamt öðru starfsfólki skólans sem svarar spurningum gesta og gangandi um hvaðeina sem tengist náminu, hugsanleg störf að námi loknu, lífið í HÍ, kennsluna, aðbúnað, félagslíf og fjölbreytta þjónustu.
Á opna húsinu verður kynnt nám á sviði félagsvísinda, heilbrigðisvísinda, hugvísinda, menntavísinda, náttúruvísinda, raunvísinda og verkfræði auk alls kyns þverfræðilegra leiða.
Hjá Háskóla Íslands starfa náms- og starfsráðgjafar sem þekkja skólann út og inn og hjálpa áhugasömu fólki að finna nám sem hentar áhuga og styrkleikum. Þeir verða að sjálfsögðu á staðnum.
Einnig verður starfsfólk frá alþjóðasviði HÍ á Háskólatorgi sem veitir upplýsingar um spennandi tækifæri nemenda HÍ í útlöndum, þar á meðal skiptinám við fjölda erlendra háskóla sem margir eru í hópi þeirra allra bestu í heiminum.
Ef þú vilt frekari upplýsingar um námið – fyrir opna daginn eða eftir hann – geturðu farið á netið og spurt nema um námið í öllum námsleiðum í grunnnámi HÍ.
Þú getur líka prófað námsvalshjólið okkar til að finna nám sem hentar þér eða leitað upplýsinga hjá Náms- og starfsráðgjöf.
Ef þú vilt kynnast háskólasvæðinu nánar, á opna deginum, fyrir hann eða bara hvenær sem er - ekki hika við að bóka þig og vini þína í Háskólagönguna.
HÍ býður á fjórða hundrað spennandi námsleiðir sem opna þér dyr að framhaldsnámi og störfum víða um heim.
- Þjónusta og stuðningur við nemendur HÍ er framúrskarandi.
- Feikigóð aðstaða er í HÍ til að læra og hreyfa sig eða bara til að slappa af með vinunum.
- Félagslíf í HÍ er mjög öflugt.
- Stúdentaíbúðir eru í nágrenninu og allt til alls á háskólasvæðinu.
- Skiptinám er fjölbreytt í hundruðum háskóla um allan heim.
- Samstarf við atvinnulíf er öflugt og tækifæri til starfsþjálfunar, rannsókna og nýsköpunar.
Háskóli Íslands hefur verið á meðal þeirra bestu í heimi í tíu ár í röð samkvæmt alþjóðlegum matsaðilum.
Komdu og finndu námið þitt! Velkomin í Háskóla Íslands.
Á opnu húsi á Háskólatorgi 2. apríl gefst kjörið tækifæri til að kynna sér nám við Háskóla Íslands
![Nemendur Háskóla Íslands ganga niður tröppur við Aðalbyggingu Nemendur Háskóla Íslands ganga niður tröppur við Aðalbyggingu](https://www.hi.is/sites/default/files/styles/mynd___kassa/public/kristei/_xp37468x.jpg?itok=GOGefNUh)