Evrópski tungumáladagurinn
Veröld - Hús Vigdísar
Auðarsalur
Enn á ný höldum við Evrópska tungumáladaginn hátíðlegan. Dagskráin, sem hefst í Veröld – hús Vigdísar þann 26. september kl. 16:30, er að þessu sinni helguð tungumálakennurum og þeirri áskorun sem uppfærsla kennsluhátta er hverju sinni.
Kennslufræðingurinn Birgit Henriksen, prófessor emirita frá Kaupmannahafnarháskóla, heldur erindi á ensku um efni bókarinnar Hvorfor gor jeg det, jeg gor? (2020). Í erindi sínu, „Why do teachers do what they do?“ mun hún beina sjónum að því hvernig eigin hugmyndir kennara, þekking þeirra og reynsla í tungumálanámi og -kennslu mótar gjarnan kennsluhætti þeirra. Telur hún að ígrundun eigin starfshátta liggi til grundvallar því að vinnulag kennara kallist á við samtímann og að framþróun verði í kennslu.
Í kjölfar erindis hennar deila tveir tungumálakennarar reynslu sinni og segja frá velheppnuðum kennsluháttum:
Ármann Halldórsson segir frá kennslu í Norræna menntaskólabekknum (NGK) og fjallar um áskoranir tengdar kennslu ensku í íslensku framhaldsskólaumhverfi. Að auki fjallar hann um tungumálakennslu hópa með ólíkan móðurmálsbakgrunn.
Í erindi sínu „Gleði í tungumálakennslu“ fjallar Ragnheiður Kristinsdóttir um fjölbreyttar kennslu- og námsaðferðir sem stuðla að jákvæðu viðhorfi nemenda til námsins. Hún spyr einnig hvort námsleikir og leikjavæðing geti glætt virkni nemenda og áhuga þeirra á náminu.
Að lokinni formlegri dagskrá gefst tækifæri til spjalls og ráðagerða yfir léttum veitingum.
Að dagskránni standa Mennta- og barnamálaráðuneyti Íslands, Vigdísarstofnun, STÍL (Samtök tungumálakennara á Íslandi) og Tungumálamiðstöð Háskóla Íslands.
Evrópski tungumáladagurinn