1 metra regla, 50 manns mega koma saman, blöndun hópa heimil – fylgjum samt sóttvörnum
Jón Atli Benediktsson, rektor Háskóla Íslands, sendi meðfylgjandi tilkynningu á starfsfólk og stúdenta í dag (14. apríl):
„Kæru nemendur og samstarfsfólk.
Sem betur fer virðist nú rofa til að nýju í baráttu okkar innlands gegn útbreiðslu kórónuveirunnar. Því hefur heilbrigðisráðherra gefið út nýja reglugerð þar sem fram koma talsverðar tilslakanir á þeim takmörkunum sem gilt hafa m.a. í starfi Háskóla Íslands. Reglugerðin tekur gildi á miðnætti og hefur hún m.a. eftirfarandi í för með sér:
- Í öllum byggingum Háskóla Íslands gildir 1 m fjarlægðarregla.
- Ef ekki er unnt að halda 1 m fjarlægð eiga nemendur og starfsfólk að nota andlitsgrímur.
- Fjöldi nemenda og starfsmanna má vera allt að 50 í hverju rými.
- Blöndun á milli hópa er heimil.
- Í sameiginlegum rýmum, s.s. við innganga, í anddyri, á salernum og göngum, er heimilt að víkja frá fjöldatakmörkun sé þess gætt að nota andlitsgrímur.
- Þar sem ekki er unnt að framfylgja nálægðartakmörkunum, s.s. í verklegri kennslu og klínísku námi, er skólastarf heimilt að gættum sóttvörnum og með því að nemendur og kennarar noti andlitsgrímur.
- Viðburðir sem ekki teljast til kennslu eða náms eiga ekki fara fram í byggingum Háskóla Íslands og takmarka á gestakomur hingað.
Við munum tryggja að sameiginlegir snertifletir í skólastofum verði sótthreinsaðir á milli nemendahópa og sömumleiðis reglulega loftun í rýmum.
Þá mun starfsfólk skólans sótthreinsa sameiginlegan búnað og snertifleti a.m.k. einu sinni á dag.
Enn á ný virðist samstaða okkar og seigla vera að skila árangri. En þótt þessi nýjasta tilslökun létti okkur svo sannarlega allt skólastarf, og fjölmargt annað í samfélaginu, megum við alls ekki gleyma okkur í amstri dagsins. Munum að einstaklingsbundnar sóttvarnir skipta mestu við að hindra útbreiðslu veirunnar.
Höldum áfram á sömu braut.
Gangi ykkur öllum vel, kæru nemendur og samstarfsfólk.
Jón Atli Benediktsson, rektor“