Námsform

Mögulegt er að ljúka námsleiðinni alfarið eða að langmestu leyti í staðnámi. Það þýðir að námskeið eru almennt skipulögð þannig að námið fer fram á tilteknum tíma og stað (t.d. í kennslurými) og gert er ráð fyrir rauntímaþátttöku nemenda. Hugsanlegt er að einstaka námskeið, skyldu- og/eða valnámskeið, séu aðeins í boði í fjarnámi eða netnámi.

Mögulegt er að ljúka námsleiðinni í fjarnámi. Það þýðir að námskeið eru skipulögð þannig að námið fer fram á netinu og gert er ráð fyrir rauntímaþátttöku nemenda í kennslustundum á neti, á netfundum, í staðlotum og/eða vettvangsnámi. Nemendur fylgja skipulagi námskeiða samkvæmt kennsluáætlun og skiladögum verkefna.

Ef próf eru í námskeiðum þurfa nemendur að þreyta þau á þeim tíma sem tilgreindur er. Þó að mögulegt sé að ljúka námsleiðinni í fjarnámi, þá má vera að einhver valnámskeið séu eingöngu í boði í staðnámi.

Mögulegt er að ljúka námsleiðinni alfarið í netnámi. Það þýðir að námskeið eru skipulögð þannig að námið fer fram á netinu og ekki er gert ráð fyrir rauntímaþátttöku, en nemendur fylgja skipulagi námskeiða samkvæmt kennsluáætlun og skiladögum verkefna.

Ef próf eru í námskeiðum þurfa nemendur að þreyta þau á þeim tíma sem tilgreindur er.

Þó að mögulegt sé að ljúka námsleiðinni alfarið í netnámi má vera að einhver valnámskeið séu eingöngu í boði í staðnámi.

Fyrirkomulag námskeiðs byggist á samkomulagi milli nemanda og kennara og námið fer fram óháð tíma og stað (til dæmis lesnámskeið eða einstaklingsverkefni).

Námsform námskeiða er mismunandi, sum geta verið staðnámskeið en önnur fjarnámskeið.

Fjarnám krefst mikillar samhæfingar verkefna og skipulags. Sé nám stundað með vinnu er skipulagning enn mikilvægari en ella. Mikilvægt er að námið sé stundað í sátt við fjölskyldu, vini og vinnuveitendur.

Skipulag

Nauðsynlegt er að nemendur setji sér markmið í upphafi náms og geri tímaáætlun. Nemendur ættu jafnframt að fara reglulega yfir það í huganum hvernig miði í náminu, hvað hafi verið vel gert og hvað megi bæta.

Vinnan í fjarnáminu er töluvert á einstaklingsgrunni en þarf þó ekki að vera einmanaleg ef nemendur notfæra sér þá samskiptamöguleika sem fyrir hendi eru.

Samskipti

Nemendur þurfa oft og tíðum að taka þátt í hópa- og paravinnu sem er háð samskiptum við samnemendur á netinu. Slík samskipti eru tímafrekari en þau samskipti sem eiga sér stað í kennslustofu.

Mikilvægt er að nemendur taki virkan þátt í því námssamfélagi sem þeir tilheyra sem fjarnemar. Gott netsamband er nauðsynlegt til að geta tekið þátt í umræðum, nálgast efni og komið því frá sér á auðveldan hátt.

Ef nemendur lenda í tæknilegum vandræðum er starfsfólk Háskólans tilbúið til aðstoðar:

• Þjónustuborð Háskólatorgi
• Tölvuþjónusta UTS