Helga og Jónína hljóta hollvinaverðlaun Minnesota-háskóla

Helga Jónsdóttir, prófessor í hjúkrunarfræði við Háskóla Íslands, og Jónína Ólafsdóttir Kárdal, náms- og starfsráðgjafi við skólann, hlutu á dögunum viðurkenningar Hollvinasamtaka Minnesota-háskóla í Bandaríkjunum fyrir annars vegar framúrskarandi forystuhlutverk á sviði hjúkrunarfræði og hins vegar fyrir óeigingjarnt hollvinastarf í þágu skólans. Minnesota-háskóli er elsti samstarfsskóli Háskóla Íslands en skólarnir fagna 45 ára samstarfsafmæli á næsta ári.

Viðurkenningar Hollvinasamtaka Minnesota-háskóla voru afhentar á árlegri Heimkomuviku (Homecoming week) skólans í lok október og voru Helga og Jónína viðstaddar hátíðahöldin. Með viðurkenningunum vill skólinn verðlauna fyrrverandi nemendur víða um heim sem hafa haft áhrif innan sinna starfsgreina og um leið styrkt háskólasamfélag Minnesota-háskóla á alþjóðavísu. Verðlaunin hafa verið veitt í nærri 80 ár og eru í nokkrum flokkum.

Framúrskarandi forystuhlutverk og rannsóknir

Helga, sem er prófessor við Hjúkrunar- og ljósmóðurfræðideild HÍ og forstöðumaður fræðasviðs hjúkrunar langveikra fullorðinna á Landspítala, hlýtur viðurkenningu fyrir framúrskarandi forystuhlutverk og rannsóknir í hjúkrun og fyrir að helga ævistarf sitt því að efla heilsu fólks. Viðurkenningin nefnist Distinguished Leadership Award for Internationals.

Helga lauk bæði meistara- og doktorsprófi frá Minnesota-háskóla og hún hefur átt stóran þátt í eflingu hjúkrunarfræði sem fræðigreinar á Íslandi, þar á meðal með stofnun Hjúkrunarfræðideildar og þróun bæði meistara- og doktorsnáms í greininni. Þá segir í umsögn valnefndar Minnesota-háskóla að Helga hafi verið brautryðjandi í innleiðingu göngudeildar undir forystu hjúkrunarfræðinga sem styður við sjúklinga með langvinna lungnateppu.

Helga er félagi Bandarísku hjúkrunarakademíunni og er í hópi 100 framúrskarandi fyrrverandi nemenda Hjúkrunarfræðideildar Minnesota-háskóla. „Helga hefur haldið sterkum tengslum við Minnesota-háskóla. Hún hefur beitt sér fyrir stöðugu samstarfi þvert yfir Atlantshafið, tekið þátt í alþjóðlegum málstofum fyrir leiðtoga og leiðbeint kynslóðum fræðafólks,“ segir einnig í umsögninni. Þar kemur einnig fram að Helga skapi umhverfi þar sem forvitni og gagnrýnin hugsun blómstrar og staðfesti þannig að hún sé ekki aðeins útskrifuð frá Minnesota-háskóla heldur einnig í hópi bestu fulltrúa skólans á alþjóðavettvangi.

Óþreytandi í hollvinastarfi sínu fyrir Minnesota-háskóla

Jónína Ólafsdóttir Kárdal, náms- og starfsráðgjafi við Nemendaráðgjöf HÍ og verkefnisstjóri Tengslatorgs Háskóla Íslands, hlýtur viðurkenningu fyrir yfir tveggja áratuga vinnu í þágu hollvinastarfs Minnesota-háskóla (e. Alumni Service Award). Jónína brautskráðist með meistaragráðu í ráðgjafarsálfræði frá Minnesota-háskóla árið 1999 og hefur æ síðan verið óþreytandi í því að stuðla að tengslum milli Minnesota-háskóla og Íslands. „Með einstöku sjálfboðastarfi hefur hún styrkt alþjóðleg hollvinatengsl og beitt sér fyrir alþjóðlegu hlutverki háskólans,“ segir í umsögn valnefndar um Jónínu.

Jónína hefur m.a. átt sæti í stjórn hollvinasamtaka fræðasviðs menntunar og mannlegs þroska (e. College of Education & Human Development) við Minnesota-háskóla og átti þátt í að setja á fót og leiddi nefndir á vegum hollvinasamtaka sviðsins sem annast alþjóðleg tengsl og veita verðlaun einstaklingum útskrifuðum frá Minnesota-háskóla sem þykja efnilegir leiðtogar. „Hún hefur tekið á móti hollvinum frá Minnesota á Íslandi, setið í heiðursnefnd skólans og sat í valnefnd sem hafði það hlutverk að finna nýjan aðstoðarrektor alþjóðamála,” segir valnefnd Minnesota-háskóla enn fremur.

Jónína hefur enn fremur leitt Hollvinafélag Minnesota-háskóla á Íslandi í yfir áratug en markmið þess er að efla tengsl þess stóra hóps Íslendinga sem lokið hafa prófi frá skólanum. Félagið hefur staðið að ýmiss konar viðburðum, t.d. hélt félagið nýlega viðburð á Lita Torgi í samvinnu við Alþjóðasvið Háskóla Íslands á Hollvinadegi Minnesota-háskóla þar sem þess var m.a. minnst að Minnesota-háskóla er 175 ára. Þennan viðburðsótti fjöldi fólks (sjá myndir neðar á síðunni).

Nærri 45 ára samstarf um skiptinám og rannsóknir

Minnesota-háskóli var fyrsti erlendi skólinn sem Háskóli Íslands gerði tvíhliða samstarfssamning við og því má segja það hafi markað upphaf að víðtæku alþjóðlegu samstarfi og umsvifum Háskóla Íslands. Skólarnir hafa bæði átt í samstarfi um skiptinám og rannsóknir og þá má geta þess að fjölmargir starfsmenn Háskóla Íslands hafa sótt sér menntun og útskrifast frá Minnesota-háskóla.

Sérstakur sjóður, Val Björnson Foundation, er starfræktur við HÍ en hann hefur bæði stutt nemendur HÍ til skiptináms og framhaldsnáms við Minnesota-háskóla. Þess má geta að bæði Helga og Jónína hlutu styrk úr sjóðnum á sínum tíma.

Fleiri myndir frá afhendingu viðurkenninganna og frá samkomu Hollvina Minnesota-háskóla Íslandi má sjá hér að neðan.