Háskóli Íslands fjárfestir í framúrskarandi rannsóknarinnviðum með mótframlagi til kaupa á rannsóknarbúnaði sem styrktur er af Innviðasjóði. Með því skapast forsendur fyrir fræðasvið, deildir og rannsóknareiningar innan háskólans til að byggja upp öflugan rannsóknarbúnað og rannsóknaraðstöðu.
Stærstu verkefnin á sviði rannsóknarinnviða njóta stuðnings Vegvísis um rannsóknarinnviði, sem hefur átt veigamikinn þátt í að efla rannsóknarinnviði og rannsóknarumhverfi á Íslandi.
Almennt er gengið útfrá því að aðgangur að öllum rannsóknarinnviðum sem fjármagnaðir eru með opinberu fé standi ytri notendum til boða, þar á meðal fræðafólki, sprotafyrirtækjum og atvinnulífi, á grundvelli vísindalegra gæða verkefna og þess að aðstaða eða búnaður sé laus til notkunar.
Háskóli Íslands er um þessar mundir að skrá tæki sín og rannsóknaraðstöðu í bókunarkerfið Calira.
Til að fá aðgang að búnaði sem hefur verið fjármagnaður í gegnum Vegvísi fyrir rannsóknarinnviði skal hafa samband við viðkomandi tengilið til að fá nánari upplýsingar um bókun búnaðarins.
